كيفاش السمسار لملايري اللي كيستاغل الصحافة قولب مول قهوة بتواطؤ مع مول دار بوعزة شكري وشرا 720 متر مربع بمليون درهم وبناها ف"كوفيد" تزوير تصميم التهيئة .

هناء ابو علي كود اولاد صالح كازا ////
مصدر الصورة
لحد اليوم 14 ابريل 2026 مازال شكري الرئيس السابق لدار بوعزة نواحي كازا هارب ومخبي. عندو استدعاءات من الفرقة الوطنية ولكن هارب واخا صحابو بحال السمسار لملايري اللي كيستغل الصحافة فالتحراميات، عارفو فين كاين. هادا لغز ما مفهومش. يعني كاين شي وحدين من غير لملايري السمسار كيحميو هاد الوجه الفاضح ديال الفساد فكازا. من سيكليس بموطور 103 لملايري خانز فلوس. من الملفات اللي متابع بها هاد المنتخب ديال البام واللي كان محمي من قيادات سابقة فالبام كاين تزوير تصميم التهيئة فدار بوعزة. اليوم ف”كود” غاديين نجيبو ليكم قضية كلها تزوير وتدليس. خدمة العصابات صافي.

كانت ارض ڤيلا فدار بوعزة على البحر فيها 720 متر مربع كيملكها ع د عندو شي قهوة فغاندي فكازا. السيد خدا ترخيص باش يبنيها. دازت 6 اشهر ما فتحش الشانتيي. بالتزامن مع هاد الشي كان خرج تصميم التهيئة ديال دار بوعزة وفيه تمنع يبني فهاديك 720 متر مربع كلها. جزء من هاد المساحة ولى ديال الدومين ماريتيم اي الملك البحري. فهاد الفترة بالضبط وكانت قبل كوفيد، جا شكري رئيس الجماعة عند مول القهوة وقال ليه راه صافي غادية تولي ملك بحري تقريبا والرخصة اللي كانت عندك ما بقاتش صالحة، عوض ما تخسر كلشي، بيعها لهادا. كيقصد السمسار لملايري اللي كيستاغل الصحافة اللي كان هو المخطط لكثير من فضايح شكري واخا ما منتخب ما مسؤول. سمسار كيف عادتو.

مول البقعة الارضية گال اللهم لعمش ولا لعما. شوية لفلوس ولا والو. باعها ليه. شي كيقول مليون درهم وشي كيقول 2 مليون درهم. المهم باع بقعة كتساوي ديك الوقت كثر من 700 مليون درهم بهاد الثمن. مباشرة باش ولات فاسمو او اسم شي حد من عائلتو، لان هادي هي سياستو، ناض شكري المتابع اليوم واللي مازال هارب من العدالة، كرئيس جماعة وخرج ترخيص باش يبني صاحبو لملايري السمسار اللي كيستاغل الصحافة، هاد الارض. اييه واخا كاين تصميم تهيئة كيمنع البني، عطاه ترخيص. هادا راه ماشي غير تزوير، راه كثر.

السمسار لملايري اللي كيستغل الصحافة ومازال حتى اليوم 14 ابريل، استغل كوفيد، وطلعها فزمن قياسي. تعرفو المغرب كيف كان فديك الفترة. اييه يا سادة هو كان يصول ويجول وخدم وجاب بناية وسالاها. هي اللي فصورة هاد الموضوع.

لملايري السمسار اللي كيستغل الصحافة فراسو باللي رئيس الجماعة زور باش عطاه الرخصة وعارف اش شرا.

هاديك البقعة سوا تبقى عندو او يبيعها راه ما كيعفيهش لا هو لا شكري من تهم جنائية كبيرة.

باش ناض شوية الصداع عليه هادي 3 سنين كان ريب شوية من هاديك الفيلا ولكن مازال مستغل الملك البحري ومازال القضية مفتوحة. قضية كتعطي صورة للي كيعيق تقدم لبلاد. تواطؤات ومصالح وفساد وفساد وفساد. المثير فهاد الشي ان عدد من مشاريعو اللي فاسمو ولا اسم عائلتو فيها مشاكل ومفتوحة عند القضاء وحتى وحدة ما صدر فيها شي حكم. حتى ترياب هونگار دار فيه وحدة صناعية فمنطقة فلاحية بتواطؤ مع نفس رئيس الجماعة السابق شكري ودعمو، لحد الان الداخلية من لفتيت حتى القايد ما قدروش يطبقو القانون.