تنظمات اليوم الجمعة 10 ابريل 2026 ، ندوة صحفية فـفندق راديسون بلو بكازا، خصصات لتقديم حصيلة 8 سنين من مبادرة “حوت بثمن معقول”، بحضور زكية الدريوش، كاتبة الدولة المكلفة بالصيد البحري، ومهنيين وفاعلين فقطاع الصيد البحري.

وفهاد اللقاء، أكدت زكية الدريوش، كاتبة الدولة المكلفة بالصيد البحري، أن المبادرة حققات نتائج مهمة فتموين الأسواق الوطنية الحوت المجمد بجودة مزيانة وبأثمنة مناسبة، خصوصاً خلال شهر رمضان، مبرزة أنها توسعات من 3 مدن فـ2019 حتى ولات كتشمل قرابة 50 مدينة فـ2026.

“كود”سول كاتبة الدولة المكلفة بالصيد البحري على إمكانية تحديد نسب أو كميات ديال الحوت اللي خاصها تبقى موجهة للمغاربة من طرف الحكومة او تكون داخلة فالسياسة العمومية للبلاد ، غير أن الدريوش وضحات فتصريح ل”كود” ،أن “تسويق السمك كيبقى مرتبط بالعرض والطلب، وما يمكنش نديرو قانون ونقولو مثلاً 50% من الثروة السمكية خاصها تبقى فالمغرب والباقي يتصدر، حيث كاين التزام مع منظمة التجارة العالمية، وخاصنا نحترمو هاد القوانين”.

ومن جهة أخرى، أضافت أن الحل ماشي فالتقييد، ولكن فابتكار وسائل أخرى لتعزيز العرض داخل السوق الوطنية، مع الحفاظ على التوازن الاقتصادي، بلا ضرر ولا ضرار خاصة وأن القطاع كيساهم بشكل كبير فإدخال العملة الصعبة.

وفي نفس السياق، نبهات المسؤولة إلى تأثير التحولات المناخية على بعض الأنواع البحرية، بحال السردين، وهو ما كيطرح تحديات حقيقية لتحقيق الاكتفاء الغذائي، خصوصاً فالفترات اللي كيرتفع فيها الطلب.

والهدف اليوم من هاد اللقاء هو تطوير هاد المبادرة وتوسيعها باش تولي حاضرة طول العام وما تبقاش غير مرتبطة بالمناسبات، مع تعزيز عرض الحوت المجمد كحل عملي لضمان استقرار السوق. كما كيبقى الرهان كذلك على تأطير المهنيين وتوفير تكوينات مستمرة ليهم، باش يتحسن التوزيع والجودة، ويتحقق توازن حقيقي بين تلبية حاجيات المستهلك المغربي والحفاظ على دينامية التصدير.