دابا تاعت الله آشنو غادي تشوه فصورة مدينة بحال فاس محزمة بالبؤس. كل مرة طايحة فيها دار فوق ماليها. شبعانة بيطالة وجريمة وتهرگاويت. راه الشفقة هو الشعور الوحيد المنطقي لي خاص يحس بيه اي واحد لحالها. هركاوا فالتسيير وغيرو رجعوها تنافس تيسة عوض فلورانس وڤينيزيا .

مصدر الصورة

محمد سقراط-كود///

دابا تعت الله آشنو غادي تشوه في صورة مدينة بحال فاس مطوقة بحزام ديال البؤس، كل مرة طايحة فيها دار فوق روس ماليها، شبعانة بطالة وجريمة وتهرگاويت، نص المدينة ماتقدرش تجبد فيه تيليفونك وتهدر، والنص لاخور الى دزتي منو غادي تكريسا مية في المية، ناسها كيهربوا منها والى درتي فيها استطلاع رأي غادي تلقى اغلب الشباب باغي يخوي واخا يمشي غير لطنجة ومايبقاش هنا، الشعور الوحيد المنطقي لي خاص يحس بيه اي واحد اتجاه فاس هو الشفقة، لأنها مدينة كانت تكون حسن وبزاف ومن أكثر المدن المغربية مؤهلات، لا من ناحية المزارات التاريخية والمدينة القديمة، أو من ناحية العمال المهرة والطبقة الوسطى قارية، سير لطنجة غادي تلقى أغلب المهن لي كتطلب اللغات أو القراية شادينها فواسة ومكانسة، بما أنها ماشي مدينة تجارية او عمالية كيبقى الإستثمار الأهم هو في الدراسة، الناس هنا كيخسروا على ولادهم باش يقراو وطبعا كتستافد منهم مدن أخرى لأن فاس زاگية فيها الوقت.

فاش كنكتب سواء أنا أو أي واحد على شي موشكيل فشي مدينة وكيفاش هاديك الحاجة ماتدارش كما يجب، كيخرجوا بزاف يرددون لازمة وحدة باغي تشوه صورة المدينة باغي تشوه صورة البلاد، نفس لي كيقولوا أي جزائري او مصري أو بزاف ديال دول أسفل السافلين على بلادهم، نفس العقلية من الطرف حتى للطرف، بين الدول المتقدمة كتلقى شعبها أكثر نقدا ليها وماعاجباهم حتى حاجة، فرنسا دولة عظمى ومع ذلك تسمع ناسها كيهدرو عليها يجيب ليك الله راه كتنهار ونهاية العالم قريبة، كذلك سويسرا ودول أخرى، ميريكان كل مرة خارجين في مظاهرة ضد شي حاجة، تاواحد ماعجباه البلاد مل واحد منين كيتشكى، كتجي للمغرب بلاد غارقة بهرگاوة غير تجبد شي ظاهرة تبغي تتبه ليها او تناقشها، كتلقى جيش ديال بنادم المغرب بزاف عليك، عندنا القفطان عندنا الكسكسو عندنا الطاجين، طنجة واقفة ليكم في الحلاقم، كازا واعرة عليكم، مراكش متوصلوهلش، وراه داكشي لي بغينا يكون في الواقع علينا كنتاقدوا.

فاس بالخصوص خاص تكون عاصمة سياحية وخاص تكون مروجة حتى المناطق المحيطة بيها، ولكن للأسف لأنها جات في المغرب وقوانين المغرب مكتشجعش على السياحة، والدليل هو الصبليون دولة قريبة لينا مقدرتاش نستافدوا حتى من السياح لي جرات عليهم مابقاتش بغاتهم، حاليا الشواطئ الإسبانية عامرة مفركعة ببنادم والناس ناشطة، بينما السواحل المغربية المقابلة ليها راه خاوية كتصفر وحتى فاش كتعمر كيستعمروها صحاب الكراسة وتعمر زبل، المدينة الوحيدة في المغرب لي كتعرف مشاريع كبرى وجودة الحياة فيها طالعة هي الرباط، كازا تدارو فيها مشاريع كبيرة ولكن للأسف عامرة بهرگاوة من مختلف الطبقات الاجتماعية وفرض القانون فيها على عدة نواحي شبه مغيب، أما فاس ومكناس وتازة وكرسيف والناظور و وجدة هادوا مدن ممحتاجينش تشوهم لأن كلمة مدينة واصلين ليها غير بالشانطي والياجور أما السلوكات والعصرنة والتمدن الحقيقي باقين بعاد عليه.