واش "البي بي إس" مكيعتارفش بالإعفاء الملكي للوزرا ديالو ومُصر على رواية مضللة وكيفاش واحد بحال الصنهاجي كان أستاذ شبح مخبي فشي مركز ديال الأشباح ومبغاش يرجع يقري ولاد المغاربة ملي تعفات شرفات كيعطي الدروس لواحد من الأحرار واجههم بالتقصير والفشل فتدبير مسؤولية حكومية .

سعيد الشاوي كود ـ الرباط//
مصدر الصورة
واش الناس ديال حزب التقدم والاشتراكية باغيين يزوروا التاريخ ويديروا رواية خاصة بهم فقضية إعفاء سيدنا جوج وزراء ديالهم سنة 2017.

هاذ الشي اللي بان مورا حضور نبيل بنعبدالله فبرنامج تلفزي بدوزيم ومواجهته بهاذ القضية ديال الإعفاء الملكي. بنعبد الله كأمين عام وسياسي حرايفي فمضيغ الهضرة مرضاش بالحقيقة الوحيدة اللي كتفسر الإعفاء ديالو ملي واجهو بها واحد الشاب سميتو المهدي يسيف من التجمع الوطني للأحرار، اللي مكندافعوش عليه ولكن من الضروري نقولو للمغاربة الحقيقة كيف ما هي بلا زواق وبلا فلسفة.

يمكن التوظيف السياسي ديال داك الشاب كان بطريقة مفيهاش عمق ونقاش كثر من التقلاز، ولكن هاذ الشي لا يغير حقيقة التاريخ. هاذ الشي ميمكنش نختالفو عليه لسبب بسيط هو أنه كاينة وثيقة مرجعية وهي بلاغ الديوان الملكي بتاريخ 24 أكتوبر 2017.

فهاذ البلاغ ديال الديوان الملكي كان القرار ديال الإعفاء واضح وحازم ومبني على مختلف التقارير اللي ترفعات لسيدنا من المفتشية العامة للإدارة الترابية والمفتشية العامة للمالية، والمجلس الأعلى للحسابات وبعد تحديد المسؤوليات وبناء على التقصير في القيام بالمسؤولية تقرر إعفاء مجموعة من الوزراء وكبار المسؤولين.

هذا هو التاريخ داكشي اللي كيهضروا عليه الناس ديال حزب نبيل يسمى محاولة جديدة للتضليل وهاذ الشي كيدخل حتا فالتملق ومحاولة تزوير التاريخ.

مدير الفريق النيابي لحزب نبيل بنعبد الله فمجلس النواب خرج فبرنامج داز فميدي 1 تيفي ، كيعطي الدروس للمهدي يسيف اللي ذكر نبيل بالفشل والتقصير ديالو ملي كان مسؤول حكومي. قالك حقا ما حقا التنشئة السياسية واحترام الأمين العام.

الناس اللي كتعرف عزوز الصنهاجي اللي كان مدير ديوان شرفات أفيلال واللي كيفوح بين معارفو وناس ديال تازة باللي هو اللي كيكتب تقارير الحزب وبيانات المكتب السياسي، غادة تفهم علاش بان كيهضر بديك الطريقة ديال شي واحد خاتر كيعطي الدروس لشاب مبتدئ دار جريمة ملي هضر مع بنعبدالله بديك الطريقة.

عادة هاذ الشباب ديال الأحزاب كينساو راسهم وكيصوروا راسهم ملائكة ولخرين شياطين. وهنا خاصنا نفكرو عزوز الصنهاجي باللي خاصو يحشم شوية لأنه حتا هو نموذج لهاذ الشباب الريعي الانتهازي واللي مستاعد يدافع على ولي نعمتو كثر من أي شيء آخر، بدليل أن الصنهاجي ملي جراو على شرفات أفيلال من الوزارة تحول لموظف شبح كياكل السحت وعوض أنه يرجع للقسم كأستاذ مشى تخبى فمركز التفتح بتدخل من نبيل عند شي جهة فوزارة التربية الوطنية وبقى مخبي تما حتا عينو نبيل مدير للفريق بأجر كبير، لذلك معندوش مشكل يخرج بصنطيحة عريضة يدافع على نبيل اللي المغاربة كيعرفوه مزيان والمكانة ديالو عندهم كتحدد ملي كيترشح للانتخابات وكيسقط ماشي بالشفوي والمزايدات ومنطق أنا بوحدي مضوي لبلاد.