الاتحاد الاشتراكي لقوات المديح والسماح.. البيجيدي وما دارهاش أ مولاي ادريس .

مصدر الصورة

فاطنة لويزا ـ كود//

في الأول سحابلي الناس مطلعينها على الاتحاد الاشتراكي من خلال فبركة صور بالذكاء الاصطناعي، ولكن فاش قلبت وسولت، لقيت بالفعل الأخبار صحيحة؟

الاتحاد الاشتراكي للقوات الشعبية نظم في المقرات ديالو، وحتى فقاعات عمومية خلال هاد رمضان ليالي ديال السماع والمديح، ومسابقات ديال تجويد القرآن.

هاد الإيمان كلو نزل على الحزب، حتى ولا زاوية. الزاوية الإدريسية. للتذكير، ففي الحركة الوطنية أيامات الاستعمار، كان في الأول كيسميو الحزب الزاوية.

ما يكونش مولاي ادريس الرابع جاتو هاد المعلومة معطلة، وسحابليه بصح كانو فأيامات الاستعمار كيديرو اجتماعات فيها المديح والسماع وتجويد القرآن والحنة.

صحيح أن الليالي ديال الأمداح والحنة هي من عادات المغاربة فرمضان، ولكن كيديروهوم الناس فديورهوم، او في الجوامع والزوايا، ماشي فمقرات الأحزاب.

وحتى إذا بغاو يبررو أن الأمر فيه مساهمة في التعريف بتقاليد مغربية، في إطار التنافس حول التمغربيت، فهاد الشي مكيدارش عن طريق الكتابات الإقليمية والجهوية ديال الحزب.

هادشي كيدار عن طريق المنظمات الموازية لي عندها علاقة بالطفولة. والاتحاد الاشتراكي عندو منظمة الطفولة الشعبية، صراحة ما عرفتش واش باقة عندو ولا لا؟

إذا كان دار عن طريق هاد المنظمة أمسيات للأطفال فيها التجويد والسماع والذكر، ممكن نبلعوها،

واخا مشروع تقدمي بحال الاتحاد الاشتراكي إذا بغا يخدم على الطفولة، كاين ما يدار وبنفس تقدمي وحداثي كيساهم في بناء الوعي النقدي عند الأطفال، ماشي حمادشة وجيلالة والليلات.

كاملين كبرنا في منظمات ديال الطفولة والشباب قريبة من اليسار: حركة الطفولة الشعبية، الجمعية المغربية لتربية الشبيبة، منظمة الطلائع، وبزاف.

وأطرونا يساريين حقيقيين…

وتعلمنا فيها قيم التضامن والتحرر والوعي النقدي، وفي الكشفية تعلمنا الاعتماد على الذات والصبر،

وفهاد الجمعيات عرفنا القضية الفلسطينية، والمقاومة المغربية ضد الاستعمار، وتعرفنا على المسرح والسينما والأدب والرقص والشطرنج.

وعرفنا أن العلاقات بين الشباب والشابات هي أسمى من الابتذال، وأنه بحال المرا بحال الرجل في الحقوق.

عرفنا ناس الغيوان، وسعيد المغربي، وفيروز ومرسيل خليفة والشيخ إمام،

والمسرح ديال الصديقي وعبد الحق الزروالي وسينما المؤلف وسينما الهامش.

وهادشي مكيعنيش أننا كنا مستلبين للشرق أو الغرب،

حيت النفس المغربي كان حاضر وبقوة.

ولكن تمغربيت بصيغة تقدمية تحررية.

حتى الأشكال الفرجوية ما قبل المسرحية بحال الحلقة وسلطان الطلبة والبساط، كنا كنديروها فالأنشطة ديالنا ولكن بمضمون تقدمي ماشي خرافي.

وهو نفس المنظور لي خلانا نديرو مجموعات غنائية كنقلدو فيها الغيوان ولمشاهب وجيل جيلالة.

دابا الاتحاد الاشتراكي لي كان جار التران ديال التقدمية، حتى هو طاح في هاد الابتذال ديال تمغربيت، لي حول تمغربيت من طموح نحو مغرب ديمقراطي حديث غادي للمستقبل، إلى تمغربيت عايشة في الماضي، كتختصر تمغربيت في الزليج والرابوز.

دابا شنو معنى تحويل مقرات حزبية إلى ليالي المديح والسماع والتجويد.

واش هادا دور الحزب السياسي؟

تبارك الله كاينة وزارة الأوقاف، وكاين المجالس العلمية، وكاين شلا جمعيات عندها طابع ديني، وحتى المدارس والثانويات فرمضان كدير مسابقات التجويد.

أش دخل حزب سياسي فهاد السوق لي عندها موالينها؟

واش هادشي ما فيهش استغلال الدين في السياسة؟

البيجيدي وما دارهاش، خلا هاد الشي لحركة التوحيد والإصلاح.

وهادشي كنا كننتقدوه عند البيجيدي، كنا كنقولو ليهوم بلي كديرو الطلامس، حيت الناس مكتفرقش بين الحزب وحركة التوحيد والإصلاح.

السي ادريس، قاليهوم مكتعرفوش، أنا هادشي كلو غنديرو في الحزب: السياسة والأمداح..

المشكل ماشي فالقرآن والأمداح. ملي كيكونو فبلاصتهوم، الله يسخر، حتى انا عزيز عليا الأمداح.

ولكن حزب سياسي ماشي هادي الوظيفة ديالو، وهادشي معندو حتى سمية، من غير استغلال الدين لأغراض سياسية.

والمشكل، ياريت لو كان كيتقن الحزب هاد الاستغلال.

حيت ديك الأنشطة داروها بشكل بهلواني مضحك، وقديما قالو جدادنا اللوالا: لبس قدك يواتيك.

أش داك لشي أمداح وتجويد. ديك الشي بان بحال الغراب لي بغا يتعلم مشية الدجاجة.

شكون يعقل على زمن الاتحاد الاشتراكي الحقيقي. حتى هو كان كيدير شلا أنشطة فرمضان وخصوصا الثقافية والفنية.

ولكن كيفاش؟

كانت محاضرات ديال أسماء بحال الجابري وجسوسوالعروي وكما عبد اللطيف وعلي اومليل ولطيفة اجبابدي وفاطمة المرنيسي، ولقاءات شعرية فيها وفاء العمراني ومحمد بنيس وعبد الله زريقة ومحمد بنطلحة.. ولقاءات فنية مع ثريا جبران والطيب الصديقي ونبيل لحلو ومحمد الركاب.

وأمسيات فنية مع المجموعات الغيوانية والأغنية الملتزمة.

كان رمضان اتحادي تقدمي تحرري يساري.

أش وقع يا هاد الناس؟ المقرات ديال الحزب تحولات لمقرات ديال الحضرة. وزعيم الحزب كيطلب البركة من مقدم فقيه في زاوية.

واخا هو نيت الحزب خاص يدير شي ليلة فاعلة تاركة يحيد الجنون والعفاريت منو:

عفاريت الريع الحزبي، العفاريت لي لاصقة في الكراسي، العفاريت لي كتبان غير ملي كتقرب الانتخابات،

في النشيد الرسمي ديال الاتحاد الاشتراكي، كاين واحد البيت: نم مطمئنا يا عمر // نحن البديل المنتظر.

هاد البيت بقا صالح فيه غير الشطر الأول: نم مطمئنا يا عمر.

حيت إذا فاق عمر بنجلون من القبر ديالو، غيحمد الله على أنه مات قبل ما يشوف هاد الفيرسيون الاتحادي في النسخة الإدريسية.

عمر بنجلون لي قتلوه ناس مغسولة دماغاتهوم بالماضوية، ولا الحزب ديالو لا يختلف عن التنظيمات الإسلاموية في تمجيد الماضي ومحاربة المستقبل.

في الأخير، كنقترح على ادريس ووليداتو بمناسبة العيد يديرو فمقر الرياض شي ديفيلي ديال القفاطن والجابادورات والجلالب.

الجلالب والقوالب.