أي إنسان فوق الكرة الأرضية وبالخصوص العرب والمسلمين خاصهم يحمدو الله ويشكروه أن ميريكان هي مولات أقوى وأعظم جيش في التاريخ وماشي إيران أو أي دولة خرى من الشيتهول كانتري، إيران عندها غير شوية ديال الصوارخ قصفات جيرانها كاملين وباغا تدمر المنطقة كلها بما فيهم أتباعها بحال العراق، والدول المسالمة بحال سلطنة عمان لي عطات إقليم بلوشستان وعدة جزر لإيران في مضيق هرمز، بينما ميريكان عندها أسلحة لي تقدر تمحي إيران من الخريطة ومع ذلك كتقصف البلاد بكل إنسانية ودقة، وحسب وزير الحرب بيت هيغسيت فراه الجيش الأمريكي أكثر جيش في التاريخ حرصا على المدنيين، طبعا كيوقعوا حوادث وكيطيحو ضحايا من المدنيين بحال أي حرب، ولكن ماشي حتى صفر فاصلة واحد في المية من لي كانوا يموتوا كون كانت ايران او سوريا او العراق او الجزائر لي عندهم السلاح الأمريكي.

صدام دار غير جوج برامل ديال الكيماوي ناض لاحهم على شعبوا، غزى الكويت وشعل العافية في آبار النفط وقتل شعبها، دخل في حرب مدمرة مع ايران بلا حتى شي فايدة ولا سبب، كذلك سوريا ومصر أيام السادات عندو جوج قرطاسات سيفطهم مع جيش لليمن في حرب أهلية، وبزاف ديال الأمثلة ديال العدوانية المجانية لي عند قادة وشعوب هاد القنت من العالم، بينما بناة الحضارة الحقيقيين كيدخلوا للحرب لأسباب وفوائد ماشي غير فابور هكاك، تقدر متحققش الأهداف بعض المرات، ولكن ميلهم للسلام والتنمية والرواج الاقتصادي هو كثر من ميلهم للعنف، راه المغرب نيت كون ماحكم المخزن البلاد راه كان خاص تمشي غير من فاس لمكناس بالزطاط، بينما في نفس الوقت كان ممكن تسارى أوروبا والعالم المتحضر كامل في أمن وأمان، وكان ولا زال الأمن في التنقل من أهم صفات الحضارة.

في التسعينات كانوا كيقولوا لينا أي مصيبة واقعة في العالم سبابها ميريكان، وميريكان هي الشر الأكبر، كبرنا وعرفنا ان الشر الأكبر هو الديكتاتوريات العربية والمتطرفين والمتشددين والإسلاميين والاخوان المسلمين والقاعدة، وأن ميريكان أو أي دولة غربية عظمى معندها حتى ربح تشوفك شي جيعان كحيان وعامر مشاكل، الازدهار ديال الدول كيخدم في صالح كولشي وخصوصا في صالح مول لفلوس، لأنه هو لي كيمول ويسلف ويبني وينقل التقنية ويورد ويستورد، أما الدول الكحيانة او الشيتهول كانتري كيما قال الحبيب ترامب، راه كيبغيو غير الصداع والمشاكل والخراب وميشوفوا راسهم غارقين في الخرى وباغين يغرقوا معاهم لي حداهم، على عكس ميريكان.