رمضان شهر ضايع من حياتي حتى دوك الشهورة لي دوزتهم كناكل العدس فأزيلال وكانت فيهم معنى.. شوف الدول لي كتعاقب مفطر رمضان كي دايرة حالتها. واش كاين شي واحد كيموت فالبحر باش يوصل ليها؟ وشوف العكس تعرف قيمة الحرية .

مصدر الصورة

محمد سقراط-كود///

بالنسبة ليا رمضان شهر ضايع من حياتي، حتى دوك الشهورة لي دوزتهم كناكل العدس في أزيلال وكانت فيهم المعنى والإفادة مقارنة برمضان، شهر مكتقدر تدير فيه حتى حاجة والبلاد شبه واقفة ولي بغيتي تقضي معاه شي غاراض جوابوا هو حتى يفوت رمضان، خصوصا وأن الدولة فارضة هاد الأجواء التعيسة ديال الرمضان بقوة القانون، كولشي جيعان كولشي مقطوع خاص تجوع معاهم وتقطع معاهم، وتنوض تخاطف معاهم على المخبازات والكزارة وفي الأسواق في نفس الساعة، ومن بعد تبدى تجري كي شي الحمق باش توصل للدار نتا والمغاربة كاملين في نفس الوقت، ومن بعد الفطور نتجمعوا كاملين اما نهبطوا للقهوة او للتراويح، مكاين غير الأنشطة الجماعية من مطلع الشمس حتى مغربها، الفردانية كتموت فاش كتفرض الدولة قوانين عقائدية على الشعب.

عندك شهر ديال الصيام وهاد الشهر غير مستقر كيتحرك مرة يجي في الشتا مرة في الصيف، وخاص تكيف مع هاد التحرك ديالو، لأنه مثلا فاش كيجي في الصيف كيقتل الموسم السياحي، ومن غير هادشي كيقلل ساعات العمل والإنتاجية، وفي الغالب بنادم كيخدم نص نهار ومن بعد كيبقى غير يتسهوك ويدور، زيد عليهم النظام الغذائي ديال المغاربة الخالي من البروتين راه أغلب الماكلة عبارة على طحين وسكر وزيت، بنادم كيظل صايم كيفطر بالشباكية الطحين مقلي في الزيت ومغطس في السكر معسل، ومن بعد التمر والحريرة ماطيشة والحمص كلها مقيومة بالطحين، الطبلة سبعين في المية منها او كثر غير طحين وأكل غير صحي عموما، وهادشي خاص يديرو في الليل فطور وعشا وسحور، طبعا كيسالي رمضان بالأمراض والزيادة في الوزن والحرقة وارتفاع السكر والمعدة وگاع انواع الامراض، وفي اللخر يقوليك الصيام صحي والفطور بالتمر مزيان للصحة.

ياك رمضان عبادة إذن آش دخل الدولة فيه، راه الهدرة على الغاء الفصل 222 ماشي ثرف أو راه هناك ما هو أهم ويستحق النضال من اجله، النضال ضد هاد الفصل هو نضال ضد ماتبقاش الدولة تعتابرنا نعاج سارحين بلا دماغ بلا إرادة بلا حرية، وخاص تبقى واقفة لينا عند راسنا باش نصومو ونأديو العبادات، هذا ماشي دور الدولة وهاد الشعب المتشابه وجزء منو مخنوق راه وضع غير صحي للبلاد، شوية دالحرية والإنسانية غادي يقدم البلاد ماشي العكس، قلب غير على لائحة ديال الدول لي كتعاقب مفطر رمضان وشوف حالتها كيدايرة، وواش كاين شي واحد كيموت في البحر باش يوصل ليها ويعيش فيها، بينما الدول لي مكتدخلش في عقائد شعبها راه بحال الجنة وكولشي كيغامر بحياتو باش يوصل ليها.