سكوب.. "كود" جابت تفاصيل حصرية على البيدوفل الفرنساوي اللي اغتصب أزيد من 89 مينور فالعالم: عاش فالمغرب لأزيد من 4 سنوات وها شنو كان كيدير عندنا .

مصدر الصورة

عمر المزين – كود////

حصلات “كود” على تفاصيل حصرية على البيدوفيل الفرنسي اللي مشدود هادي عامين ففرنسا بشكل احتياطي على خلفية تورطه فجرائم كتتعلق باغتصاب أزيد من 89 قاصر فعدد من دول العالم من بينهما المغرب.

ووفق ما كشفت عنه مصادرنا، فإن يتعلق بـ”Jacques François leveugle” المزداد بتاريخ 1946/09/26، واللي قرا الإعدادي والثانوي فالعاصمة الرباط، مشيرة إلى أنه كان عايش مع الوالد ديالو فبلادنا المسمى “جون لفوكل”.

المصادر ديال “كود” كشفت أن هاد البيدوفيل كان كيهضر بالدارجة المغربية والسبب ديال التواجد ديالو داخل بلادنا كان راجع بالأساس في البداية لكون أن الوالد ديالو كان فالرباط.

نفس المصادر كشفت أن المعني بالأمر تنقل بين عدد من الدول، من بينها ألمانيا والبرتغال والفلبين وكولومبيا والجزائر والمغرب التي استقر بها بشكل رسمي، وتحديدا بمدينة خنيفرة منذ سنة 2010 حتى سنة 2014، قبل أن يغادر بلادنا، وبدا يجي بشكل متقطع لخنيفرة.

وبشكل فعلي، حسب مصادر “كود”، خوا المغرب شهر فبراير من سنة 2024 ومابقاش رجع بشكل نهائي.

نرجعو لكيفاش عاش عاد البيدوفيل عندنا. حسب مصادرنا، فإن هاد السيد كان معروف بالنشاط الجمعوي وتدريس الأطفال اللغة الفرنسية داخل منزله، والفهم ديالو للدرجة المغربية كان كيسهل عليه باش يتواصل مع الدراري الصغار، بالإضافة إلى كونه كان كيدير أعمال تطوعية فالحي اللي كان ساكن فيه واللي سميتو “حي سيدي بوتزكاغت”.

هاد السبعيني اللي مشدود دبا ففرنسا، وفق مصادر “كود”، كان شرا دار لشي عائلة فمدينة خنيفرة وخدا ليها حتى طوموبيل، وساعد بعض الشباب اللي عندهم علاقة بهاد العائلة باش يهاجرو لدولة فرنسا.

البيدوفيل Jacques François leveugle، تؤكد مصادر، أنه معمّر تسجلات بيه شي شكاية سواء أمام مصالح الدرك الملكي بخنيفرة أو مصالح الأمن الوطني بالمدينة. يعني معمّر طاحت بيه شكاية كتتعلق بالاغتصاب أو شي حاجة من هاد القبيل من انهار حط رجليه فالمدينة وإلى حدود الساعة.