نسبة ملء السدود وصلات لـ65,23 فالمية.. والخبير فالمناخ بنعبو لـ"كود": المغرب قرّب يرجع لأرقام 2018 بفضل الواردات المائية والثلج غايكون السند الحقيقي للفرشات المائية .

عمر المزين – كود///

كشفات وزارة التجهيز والما، نهار السبت، على أرقام جديدة كتبشّر بالخير بخصوص وضعية الما فالمغرب، حيث وصلت نسبة ملء السدود لـ65,23 فالمية، أي أكثر من 10,9 مليار متر مكعب، مقارنة مع غير 27,71 فالمية فنفس الفترة من العام اللي فات، وهو تطوّر كبير جا بفضل الشتا اللي عرفها هاد الموسم.

وفهاد الإطار، قال الخبير فالمناخ محمد بنعبو بأن «على عكس سبع سنين ديال الجفاف اللي عاشها المغرب، راه اليوم كاينين كميات هائلة من الواردات المائية اللي استقبلناها، واللي كان عندها وقع إيجابي كبير على حقينة السدود»، وزاد مؤكّد بأن «المغرب قرّب يوصل لأرقام سنة 2018 اللي فاقت جميع التوقعات، وهاد الشي غادي يكون عندو تأثير مزيان على مؤشرات الأمن المائي والغذائي».

وأوضح بنعبو بأن «الحاجة الإيجابية الأخرى هي الخزان المائي اللي كتحافظ عليه قمم الجبال على شكل ثلوج، واللي غادي تمكّن الفرشات المائية الباطنية من التعبئة بطريقة انسيابية وتدريجية فالأشهر الجاية».

مصدر الصورة

وعلى مستوى الأحواض المائية، سجّل حوض أبي رقراق واحد من أعلى النسب وطنيا بـ92,2 فالمية، بمخزون قرّب لـ998,6 مليون متر مكعب، مدعوم بالأداء القوي ديال سد سيدي محمد بن عبد الله اللي وصل لـ94 فالمية.

وفحوض اللوكوس، وصلت النسبة لـ89,3 فالمية بمخزون كيتجاوز 1706 مليون متر مكعب، حيث تعمّرات سدود وادي المخازن وشفشاون والنخلة مية فالمية، بينما سد خروب وصل لـ99 فالمية، وسد سمير لـ98 فالمية، فحين بقى سد جمعة ضعيف غير بـ19 فالمية.

أما حوض سبو فبلغ المخزون ديالو 4707 مليون متر مكعب بنسبة 84,7 فالمية، مع امتلاء سدود الساهلة وبوهودة ومنع سبو وباب لوطا، وسد الوحدة وصل لـ88 فالمية.

وفحوض تانسيفت تسجلات نسبة 82,1 فالمية، وسد أبي العباس السبتي وصل لـ98 فالمية، يليه سد مولاي عبد الرحمان بـ96 فالمية.

وبالنسبة لحوض كير–زيز–غريس، وصلت النسبة لـ59,3 فالمية، حيث سد حسن الداخل سجّل 76 فالمية وسد قدوسة 35 فالمية، بينما حوض سوس–ماسة حقق 53,9 فالمية، مع امتلاء سد أولوز بالكامل، وسدّي مولاي عبد الله وأهل سوس بـ99 فالمية، مقابل 48 فالمية فسّد يوسف بن تاشفين.

وفالجهة الشرقية، وصل حوض ملوية لـ52,6 فالمية، وسد واد الزا تعمّر مية فالمية، وسد محمد الخامس وصل لـ83 فالمية، فحين بقى سد الحسن الثاني غير فـ31 فالمية.

أما حوض أم الربيع فبلغ 38,3 فالمية، مع امتلاء سد سيدي إدريس بالكامل، ولكن سد المسيرة بقى ضعيف غير بـ17 فالمية، بينما حوض درعة–واد نون وصل لـ32,7 فالمية، تصدّرها سد أكدز بـ42 فالمية.