أخنوش كيوقّع مع مستثمرين كبار وكيبدا تنزيل "عرض المغرب" للهيدروجين الأخضر فالأقاليم الجنوبية .

مصدر الصورة

عمر المزين – كود///

استقبل رئيس الحكومة، عزيز أخنوش، اليوم الخميس بحضور الرئيس المدير العام ديال الوكالة المغربية للطاقة المستدامة (مازن) طارق أمزيان مفضال، ممثلي المستثمرين الوطنيين والدوليين اللي توقّعات معاهم العقود الأولية ديال حجز الوعاء العقاري، من بعد ما كانت مشاريعهم تْنتقات من طرف لجنة القيادة.

هاد اللقاء جا، حسب بلاغ لرئيس الحكومة، توصلات بيه “كود”، فإطار تنزيل “عرض المغرب” فمجال الهيدروجين الأخضر، تنفيذا للرؤية الملكية، اللي كتهدف باش المغرب يولي من الدول اللي عندها مؤهلات قوية فهاد المجال الواعد.

وفبداية اللقاء، نوّه رئيس الحكومة بالمجهودات اللي تبدلات باش يتم الاستجابة للمشاريع المتعددة اللي جابوها المستثمرين والرواد العالميين فمجال الهيدروجين الأخضر، وأكّد بأن الحكومة ساهرة على التنزيل السريع والفعّال ديال “عرض المغرب”، اللي كيشكّل إطار عملي وتحفيزي وكايشمل السلسلة كاملة ديال القيمة فقطاع الهيدروجين الأخضر فالمغرب.

ووضّح رئيس الحكومة بأن الرهان ديال المملكة المغربية تحت قيادة الملك على تطوير قطاع الهيدروجين الأخضر، ولا اليوم منعطف حاسم باش يساهم فتحقيق السيادة الطاقية، اعتماداً على الموارد الطبيعية الغنية والمتنوعة، والكفاءات الوطنية، وكذلك القدرة على بناء شراكات استثمارية متوازنة وفعّالة.

يذكر بأن عملية انتقاء المستثمرين اللي ناويين ينجزو 5 مشاريع جديدة وهيكلية فالجهات الجنوبية الثلاث للمملكة، دازت وفق منهجية علمية وشفافة، بالإضافة إلى أن حجز الوعاء العقاري العمومي الخاص بهاد المشاريع الاستراتيجية، خاضع لآلية كاتضمن الحماية ديالو وحسن الاستعمال ديالو.