من سطات.. ها شنو قالو كسابة على مراحل توجاد الصردي للي غا يشارك فعملية اختيار ووشم هاد السلالة الزوينة (تصاور) .

مصطفى المزابي – كود بني مسكين //

قبل ما تبدا عملية اللجنة الوطنية لانتقاء ووشم سلالة الصردي بالجماعة الترابية القراقرة بإقليم سطات، اليوم الخميس، دار طاقم “كود” زيارة لكسابة مشاركين في هاذ التظاهرة من جماعة اولاد عامر نواحي البروج.

وفهاذ الصدد سولات “كود”، الكساب عبد الرزاق النازي عن تاريخ سلالة الصردي، وأكد فجوابو على أن هاذ السلالة توجدات مع جدودنا وحنا صورنا هذا القطيع رغم الإكراهات لي كيعرفها القطاع، او دبا حنا فرحانين باش نقدمو هذا القطيع المتنوع بين إناث او فحولة، ولي سبق تم الاختيار ديالهم من القطيع لي تنقسم إلى اربع، فيها الحولي ديال الفحولة وفيها الحولية وفيها الحولي ديال العيد الكبير بالإضافة إلى النعجة.

مصدر الصورة

وفي هذا السياق جا الأب ديالو الحاج احمد النازي، للي سولاتو “كود”، على أصل القطيع او جاوب أن هاذ الصردي ملي حلينا عينينا على هاذ الدنيا صبنا الوليد ديانا كاسبينو، او استمرينا في كسب هذا البركة ديال الصردي، الميزة ديالو ياكل فالأسود ويمشي فالأسود ويرعى فالأسود، ومنطقة بني مسكين معروفة بتربية الصردي، وهاذي تقريبا حوالي 45 سنة وأنا داخل هذا الجمعية ولي سهرات على تطوير الصردي، وأضاف أن منطقة بني مسكين كي صلح فيها الصردي، وذلك بسباب العوالم المناخية بالإضافة إلى الأرض أي المرگد ديال الارض، وعزيز على المغاربة بالجمال ديالو واللحم ديالو .

مصدر الصورة

من جهة ثانية، قال أحد أعضاء الجمعية الوطنية لتربية الأغنام والماعز مصطفى بونافع، ولي قال إن هذا العملية ديال وشم فحل الصردي كتدوز من مجموعة ديال المراحل، منها عملية انتقاء إناث ولي كتبدّا من اختيار الحولية ولي من بعد غادي تكون هي مصدر الصردي بعدها يتم اختيار الأحجام العالية لي كيقدموها فالعيد الكبير عاد زيد الأحجام المازوزية، ولي تتكون فحل، وزاد وصف هاذ التجمع بأنه عرس كيحضرو فيه الناس من برا باش يحتافلو بالصردي للي كيتلاءم مع الجو ديال المنطقة ومع الارض ديال بني مسكين.