شكرا وليد وسير فحالك ما تمشيش مع المنتخب للمونديال وجيبو لينا عالمي بحال مورينيو .

مصدر الصورة

كود مصطفى الشاذلي /////

وليد الركراكي مدرب ردخل لتاريخ الكورة فبلادنا. ربح الشامبيونز ليگ مع الحمرا. وصل لدومي فينال ديال كأس العالم بقطر. لعب الفينال كأس افريقيا للامم كلعاب ف2004 اللي ربحاتها تونس. لعب الفينال ديال الكان اللي تنظم فالمغرب مع الاسود كمدرب. بالماريس كبير خاصو الاشادة والاحترام. خاصو التكريم. دابا المنتخب المغربي لكرة القدم محتاج لمدرب جديد.

يستاحق الركراكي وسام واحتفال وبعدها يمشي فحالو. نجيبو مدرب كبير ماشي بالضرورة يكون محلي ويدينا لكأس العالم.

ما تگولوش لي ما بقى غير 5 اشهر للمونديال ما يمكنش نبدلو المدرب. راه حنا درناها فمونديال قطر. المغرب بدل وحيد خاليلوفيتش بالركراكي قبل اقل من هاد المدة ومشينا ووصلنا لنصف النهاية

الركراكي استنزف راسو كمدرب مع الاسود. لعبو مكشوف. فكأس افريقيا بان مزيان فماتش نيجيريا والكاميرون. كنهدرو على منتخبات كبيرة. من بعد بان ضعفو فالفينال. فشل يلقى حلول لخنق مدرب السينغال لجهتي حكيمي ومزراوي. ما بقاش عارف كيفاش يخرج الكورة من اللور. طفى معاه دياز. ما كانش عندو بديل صحيح لاوناحيباش تعطب ليه بقى تالف.

لعاب بحال اوناحي كان غادي يغير بزاف ماتش الفينال.
الركراكي جاب لعابة ماشي واجدين. كذب على لمغااربة بزاف باش كرر باللي اللي ما واجدش 100 فالماية ما يلعبش. شفنا مع سايس بدا الكان وهو يتعطب. تبعو اوناحي. تبعو بنصغير. قبلو كان امرابط. بلا ما نهدرو على حالة ايگامان. هادو كلهم ما كانش يعيط عليهم كون طبق الركراكي غير كلامو.

لعب الركراكي ولى مفروش. ما كيبدلوش. دابا سالى الكان خاصو يتبدل.

ممكن ياخذ شي منصب فالجامعة الملكية لكرة القدم ايلى بغى ولا يمشي يجرب تدريب فراقي او منتخبات اخرى.

المغرب محتاج لمدرب كبير فهاد المونديال وعلاش اللا مدرب لمدة قصيرة من حجم مورينهو. ما غاليش دابا بزاف. يبغي يلعب فالمونديال.

هاد اللعابة اللي عندنا مزيانين بزاف. ما يمكنش يزيدو يتكرفصو مع مدرب استنزف راسو