بنعبو الخبير فالمناخ كيحذر عبر "كود" من استمرار الأجواء المضطربة والنشرات الجوية الإنذارية.. خاص الناس ياخذوها بجدية .

مصدر الصورة

عمر المزين – كود///

حذّر محمد بنعبو، مدير المركز الوطني للأمن البشري والتغيرات المناخية، من استمرار الأجواء المضطربة فالمغرب خلال الأيام الجاية، مؤكّد باللي البلاد داخلة فمرحلة ديال طقس متقلّب، كتغلب عليه الرياح القوية، الأمطار الغزيرة، وحتى التساقطات الثلجية فعدد من المناطق.

وقال بنعبو، فتصريح لـ”كود”، أن المناخ الرطب غادي يبقى مسيطر على بزاف ديال الجهات، بحيث متوقّع شتا معتدلة حتى لغزيرة ما بين طنجة والدار البيضاء، وزيد عليها تساقطات ثلجية خفيفة حتى متوسطة فجبال الريف والأطلس.

وأوضح أن الثلوج غادي تهم بالخصوص مدن تازة، كرسيف، صفرو، بولمان، ميدلت، إفران، أزيلال، الحسيمة، بني ملال، تارودانت، الحوز، تنغير، ورزازات.

أما الأمطار القوية فغادي تكون فمدن العرائش، القنيطرة، سيدي قاسم، الحسيمة، تطوان، المضيق-الفنيدق، شفشاون، فحص-أنجرة، طنجة-أصيلة، وزان، تاونات، صفرو، إفران، تازة، أزيلال، بني ملال، خنيفرة، ميدلت.

وزاد بنعبو وقال بلّي ابتداءً من صبيحة نهار الخميس متوقّع تساقطات مطرية قوية كتتراوح ما بين 70 و100 ملم فعدة مدن، من بينها طنجة-أصيلة، تطوان، العرائش، القنيطرة، شفشاون، الحسيمة، وزان، فحص-أنجرة، تازة، تاونات، صفرو، مولاي يعقوب، مكناس، إفران، خنيفرة، ميدلت، بني ملال، أزيلال.

وختم بنعبو بالتأكيد على أن هاد النشرات الإنذارية خاصها تتاخد بجدية كبيرة، ودعا المواطنات والمواطنين باش ياخذو الحيطة والحذر، خصوصاً مستعملي الطرق فالمناطق الجبلية، مع الالتزام بتعليمات الدرك الملكي والوقاية المدنية والسلطات المحلية فالطرق الوطنية، باش يتفادو أي مخاطر ممكنة بسبب هاد الاضطرابات الجوية القوية.