الدكتورة المغاري أخصائية نفسية لـ"كود": نهائي كأس إفريقيا خلّى جرح نفسي جماعي عند المغاربة حيث المنتخب جزء من هويتهم وها شنو خاص .

عمر المزين – كود///

صرّحت الدكتورة وصال المغاري، أخصائية نفسية ومعالجة نفسية وخبيرة فالتنمية الذاتية، أن كرة القدم لعبة وجدانية قوية بزاف، ومن منظور علم النفس الاجتماعي فالمنتخب كيمثل هوية اجتماعية ورمز وطني، كيسقطو عليه الناس آمالهم وصورتهم على الذات الاجتماعية، وخاصة فالسياق ديال مباراة نهائي كأس إفريقيا.

ومن جهة أخرى، أكدت المتحدثة فتصريح لـ”كود” أن الشعب المغربي شعب ديال التماهي والانتماء، وكلما كان هاد التماهي قوي، كتكون الصدمة أقسى فحالة الخسارة، بحال اللي وقع بعد هزيمة المنتخب الوطني فنهائي كأس إفريقيا.

وأضافت أن من بعد ماتش نهائي كأس إفريقيا والظروف اللي داز فيها، بانوا بزاف ديال المشاعر السلبية بحال الخيبة والإحباط، وحزن جماعي كيقرب لحالة حداد، وهاد الشي بان فالنقاشات العامة، فوسائل التواصل الاجتماعي وحتى فمزاج الشارع العام.

مصدر الصورة

كما ظهرت موجة ديال الغضب، والإحساس بالمؤامرة، والإسقاط، اللي خرجات خطابات محرضة على الكراهية والتمييز، وهاد الغضب الجماهيري، حسب تعبير الدكتورة وصال، ما هو إلا آلية نفسية لتفريغ الألم النفسي اللي خلّفاتو خسارة نهائي كأس إفريقيا، بلا ما يتحملو الإنسان داخلياً.

وأكدت أن هاد المشاعر كاملة طبيعية، جماعية ومؤقتة، وما كتعتابراش اضطرابات نفسية حيث مرتبطة بسياق محدد، وهو سياق نهائي كأس إفريقيا، ولكن الخطورة كتبدا ملي كتتحول هاد المشاعر لعدوانية، عبر خطابات كتستعمل لتبرير العنف الرمزي أو الجسدي وكتغذي الإحباط العام.

وأوضحت أن دور المقاربة النفسية، ومن خلال دور الأخصائي النفسي فهاد المرحلة الحساسة اللي جاية مباشرة من بعد نهائي كأس إفريقيا، كيتجلى فتطبيع المشاعر، عبر التشجيع على الاعتراف بالألم بلا تهويل ولا مبالغة، وتوجيه الخطاب من منطق اللوم لمنطق الفهم والاستيعاب، وخاصة تعزيز المرونة النفسية الجماعية واعتبار الفشل جزء من التجربة الإنسانية.

وختمت الدكتورة وصال المغاري بالقول إن خسارة كأس إفريقيا مؤلمة نعم، ولكن الألم النفسي ما كيجيش من الهزيمة فنهائي كأس إفريقيا فحد ذاتها، كيجـي من ربط الكرامة والهوية بنتيجة ماتش، حيث الصحة النفسية كتبدا ملي كنحبو بلا ما نعلّقو ذاتنا على لوحة النتائج.