الركراكي ماشي غير مدرّب، الركراكي لاعب شطرنج ماهر. كيحرّك القطع ديالو بعقل بارد، خطوة بخطوة، بلا تهور وبلا استعجال. من أول الماتشات وهو كيسير المجموعة بثبات، كيقرا الخصوم، وكيطلع بالمنتخب تصاعدياً فالأداء، حتى وصلنا ضد نيجيريا لأعلى مستوى تكتيكي ممكن.

النسق ديال المنتخب طلع شوية بشوية. ما كانش انفجار مفاجئ، كان بناء ذكي. وتغلبنا على إصابات ما كانتش سهلة نهائياً: سايس، أوناحي، وأمرابط. أسماء وازنة، ولكن رغم الغياب، المجموعة بقات متماسكة، وكل واحد دخل عرف الدور ديالو ولعب بمسؤولية.

صحيح، ماشي كل ماتش كان بنفس اللمعان. لعبنا بأسلوب “مويان” فبعض اللقاءات، وماتش تنزانيا كان استثناء واضح. ولكن كرة القدم ماشي استعراض، كرة القدم مسار ونتائج. وضد نيجيريا، وصلنا للكمال الكروي.

120 دقيقة كاملة والركراكي كيسير المباراة بحساب دقيق. سدّينا گاع المنافذ، قتلنا المساحات، وما خلّينا حتى طريق ساهل للهجوم النيجيري. حاولنا من جميع الجهات، صبرنا، ضغطنا فالتوقيت الصحيح، وبقينا منظمين حتى آخر دقيقة.

واجهنا آلة هجومية كتخوف، ولكن الخطر ديالها ما بانش. لقمان وأوسيمن، أبرز جوج مهاجمين فالكأس، تفرّض عليهم الصمت بمراقبة ذكية وقتال جماعي.

وملي وصلنا للضربات الترجيحية، كان عندنا بونو. حارس كبير، كيطلع فالمواعيد الثقيلة وكيحسم.

هذا ماشي صدفة، هذا خدمة. هذا تخطيط. وهذا مدرب كيعرف اللعبة، ومنتخب كيلعب بعقل وقلب واحد.

ودابا، كنستناو نفس الروح ونفس التركيز ضد السنغال نهار الأحد فالفينال. إيلى لعبنا بنفس الانضباط وبنفس الإيمان، الكأس قريبة وتقدر تكون مغربية.