اخنوش صدم طبقة سياسية مغربية لاصقة فالكرسي ونساحب فقمة مجدو السياسي ودشن عهد جديد فالممارسة السياسية فبلادنا .

مصدر الصورة

كود سعيد الشاوي كازا ////

فيوم عندو قيمتو التاريخية فالبلاد اللي هو يوم وثيقة المطالبة بالاستقلال 11 يناير 1944 خدا سياسي مغربي قرار يعد سابقة فتاريخ الممارسة السياسية بالبلاد. عزيز اخنوش رئيس التجمع الوطني للاحرار علن فلقاء مع عدد قليل من الصحافيين منهم “كود” بمقر الحزب بحي الرياض بالرباط ان المؤتمر الاستثنائي المقبل للحزب غادي يكون نهار 7 فبراير المقبل بالجديدة وانو غادي يتم انتخاب رئيس جديد. هادا يعني ان اخنوش اللي كيرأس الحكومة، ما غاديش يترشح ما غاديش يقلب على ثغرات فالقانون الداخلي للحزب باش يزيد ولاية ثالثة.

اخنوش فلقاؤو اللي كانت فيه “كود” كان حاسم فالموضوع، قال باللي القرار “شخصي” وجا من “قناعة شخصية” وخداه بصفة نهائية فراس العام بعد تفكير”. اخنوش شدد على انو قرار صائب كيعطي للعمل السياسي صورة ايجابية

اخنوش دشن سابقة فالعمل الحزبي بالمغرب. رئيس جا وربح الانتخابات فماتش صعيب بزاف ضد العدالة والتنمية وطيحهم فانتخابات 2021 التشريعية. طلع لرئاسة الحكومة فوضعية صعيبة وقاد اصلاحات هيكلية كبيرة واسس للدولة الاجتماعية اللي فيها الفقير عندو دعم مالي وعندو تغطية صحية مقادة.

هيكل الاقتصاد وقاد اصلاحات هيكلية كبيرة فهاد الميدان. اخنوش وصل اليوم لمجدو السياسي. هو اكد فندوة اليوم باللي ايلى كانت شي انتخابات تشريعية راه حزبو غادي يربحها. تصورو فهاد المجد ومع كل الحروب اللي دارت لو ماشي من الخارج بل من داخل المخزن قدر يصمد وحافظ على صدارة حزبو فالمشهد السياسي المغربي.

اخنوش اليوم عطى درس لقادة احزاب مغربية متشبثين بالكراسى. تصورو شي وحدين ما عندهمش خدمة الا السياسة. كاين اللي 40 عام وهو لاصق فبلاصتو.

قرار اليوم ديال اخنوش غادي يزلزل هاد الناس. غادي يغير امور كثيرة فالحياة الحزبية المغربية. غادي يصطي هادوك اللي حرشوهم يسبوه ورجعو معارضين ليه.