السدود عامرة والضغط مازال كاين.. الخبير بنعبو لـ"كود": راه الجفاف مزال ما تسالاش وخا كاينة هاد الانتعاشة المائية غير المسبوقة .

عمر المزين – كود///

قال محمد بنعبّو، مدير المركز الوطني للأمن البشري والتغيرات المناخية، فتصريح لـ”كود”، إن الوضعية المائية فالمغرب عرفت واحد تحسّن مهم خلال هاد الفترة، حيث وصل الحجم الإجمالي ديال المياه المخزّنة فالسدود الوطنية إلى 7586 مليون متر مكعب، بنسبة ملء عامة بلغت 45.2%، وهي نسبة ما كانتش كتتسجّل منذ سنوات.

وأوضح بنعبّو أن حوض سبو مازال كيتصدّر الأحواض المائية وطنياً بنسبة ملء وصلت لـ 53.6%، وبمخزون كيقارب 2980 مليون متر مكعب، مع تسجيل سدود بحال علال الفاسي اللي وصل لـ 100%، وسد الوحدة بنسبة 57% بما يفوق 2016 مليون متر مكعب.

وأضاف المتحدث أن حوض اللوكوس حافظ على وضعية مزيانة بنسبة ملء تجاوزت 62%، مشيراً أن سد واد المخازن وصل تقريباً للامتلاء الكامل، إلى جانب سدود أخرى عامرة، مقابل استمرار ضعف التخزين فسد دار خروفة.

مصدر الصورة

وبخصوص حوض أبي رقراق، أكد بنعبّو أنه وصل لوضعية شبه مثالية بنسبة ملء 95%، حيث سجّل سد سيدي محمد بن عبد الله الامتلاء الكامل، وهو ما كيشكّل عنصر أساسي فاستقرار التزويد بالماء الصالح للشرب لمدن الرباط وسلا والدار البيضاء.

وفي ما يخص حوض تانسيفت، أوضح بنعبّو أن نسبة الملء العامة وصلت لـ70%، مع تفاوت واضح بين السدود، في حين عبّر عن قلقه بخصوص حوض أم الربيع اللي مازال كيسجّل نسبة ضعيفة ما فاقتش 19.7%، رغم الانتعاشة الجزئية اللي عرفها سد المسيرة.

وختم بنعبّو تصريحو بالتأكيد على أن الوضعية المائية العامة فالمملكة كتعرف تعافي تدريجي وبمؤشرات قريبة من سنوات رطبة عرفها المغرب فالعقود الماضية، لكنه شدّد فالمقابل على أن هاد التحسّن خاصو يرافقو وعي جماعي وترشيد صارم فاستعمال الماء باش يتم الحفاظ على هاد المكاسب وما نرجعوش لدوامة الخصاص المائي من جديد.