جا الوقت اللي يتبورد فيه لشكر ومن حقو. لا البام لا الاستقلال دارو عليه فيثو فحكومة اخنوش واليوم خاصو يفرض عليهم الا يدخل هو وبنتو اللي تستاحق او ما يدخلش الاتحاد للحكومة .
كود احمد الطيب ////
البارح خرج هاداك ضعيف الشخصية ديال نزار بركة امين عام حزب الاستقلال باش يدوز رسالة للاتحاد الاشتراكي. عارف باللي البام باغي يدير حكومة مع احزاب الكتلة اللي ما بقاتش اي الاستقلال والاتحاد الاشتراكي والتقدم والاشتراكية. ناض خرج فجريدتو باللي فالهندسة الحكومية “جرى تحديد الكتلة الرئيسية والمشكلة أساساً من حزب الأصالة والمعاصر، حزب الاستقلال، حزب التقدم والاشتراكية” قبل ما يزيد البركة ف”العلم” الناطقة الرسمية باسم حزبو “يظل موقف حزب الاتحاد الاشتراكي للقوات الشعبية معلقاً في انتظار ما سيسفر عنه اجتماع مجلسه الوطني المرتقب السبت”
وباش يرسل ما يشبه التهديد لادريس لشكر زاد باللي “المشاورات المفتوحة مع حزبي الحركة الشعبية والاتحاد الدستوري؛ وهو ما يجعل الصيغة النهائية للأغلبية مؤجلة قليلاً ومفتوحة على كل الاحتمالات خلال اليومين المقبلين”. رسالة واضحة منو واخا ما عندو علاقة بتشكيل الحكومة هي : ايلى ما بغاش الاتحاد راه الحركة والاتحاد الدستوري واجدين.
غير هو استاهن بادريس لشكر. بصاح محنك سياسي وقافز بزاف. باش بغات رئيسة الحكومة المعينة المكلفة بانشائها توضع ليه خطوط حمراء تلميح او بوضوح: لا لاستوزارك انت. لا لاستوزار بنتك خولة، دار معاهم السياسة.
اول حاجة دارها هو اجل المجلس الوطني اللي غادي يكون 10 اكتوبر 2026 باش يحسم قرار المشاركة من غيرها. غادي يكون نقاش كبير ولكن الاتحاد الاشتراكي ما يرضاش انو الوحيد اللي مستهدف بعدم استوزار لا الكاتب الاول ولا بنتو واخا خولة لشكر تقدر تكون من احسن وزيرات فحكومة المنصوري.
لشكر عندو حساب اخر مع البام والاستقلال. راهم بجوج وبدرجة اكبر حزب الاستقلال اللي دار عليه ڤيتو باش ما يشاركش فحكومة اخنوش. كان رئيس الحكومة اللي مازال فانتظار تعيين سيدنا للحكومة وتصويت البرلمان على برنامجها الانتخابي، باغيه يكون. ناض بركة اعتارض ولكن مشى كيقول ما تقولو والو كي عوايدو
اليوم التاريخ عطى للشكر فرصة واعرة للانتقام منهم. حكومة بلا لشكر ضربة كبيرة للبام ولتسويقو “باغي حكومة مع الكتلة. حيت ما كايناش كتلة بلا اتحاد اشتراكي.
من حق لشكر ومن حق كل اتحادي اليوم يتبورد على اللي سبق وحاربوه. من حقو يرجع ليهم الصرف. تواجدو فالحكومة او فالمعارضة عندو بحال بحال بل المعارضة مزيانة ليه كثر. لكن الحكومة بلا الاتحاد غادية تبقى ديما حزبها اللي كيقودها “البام” كيقلب على الشرعية. هاد الشرعية ممكن يعطيها ليه الا مشاركة لشكر وعليه خاص السي ادريس يبقى متشبث باستوزارو هو واستوزار بنتو وبجوجهم يستاهلو وبزاف.
