كود -كازا //

التأمين ديال الطوموبيلات فالمغرب غادي يدخل لمرحلة جديدة، حيث الشهادة الورقية ديال التأمين غادي تلغا بشكل نهائي ابتداءا من فاتح يوليوز 2027.

محمد حسن بنصالح، رئيس الجامعة المغربية للتأمين، علن هاد التوجه فاللقاء السنوي العاشر للاتحاد الوطني لوكلاء ر وسطاء التأمين بالمغرب، اللي تنظم اليوم الخميس 8 أكتوبر، وقال بلي الغرض هو تحيد كليا الوثيقة الورقية ديال التأمين ابتداء من يوليوز العام الجاي.

هاد التحول الرقمي بدا من قبل، وتحديدا من فاتح يوليوز 2026، مع إطلاق مرحلة تجريبية لشواهد التأمين اللي فيها QR Cod

السيستام غادي يخلي شواهد التأمين إلكترونية ومؤمّنة، وغادي يمكن الناس يتأكدو بسهولة وفأي وقت واش التأمين ديال الطوموبيل ديالهم مازال صالح ولا لا.

وفنفس الوقت، غادي تتبدل حتى طريقة المراقبة فالطريق، حيث دار نظام تقني رهن إشارة شركات التأمين والأمن اتلوطني والدرك الملكي، وولات العناصر اللي كدير المراقبة عندها أجهزة كتقرا QR Code وكتعطيها مباشرة معلومات على وضعية التأمين ديال الطوموبيل.

هاد الرقمنة ما غاديش تأثر غير على أصحاب الطوموبيلات والمراقبين، ولكن حتى على شركات التأمين والوسطاء ديالها، بحيث من المنتظر تنقص بزاف ديال الإجراءات والخدمة الإدارية المرتبطة بالوراق.