نتائج انتخابات 23 شتنبر شعلتها فدورة أكتوبر لمجلس جماعة كازا.. كلاشات بين الاستقلال والأحرار والبام وسط اتهامات بتسييس المجلس والفساد و’’صاك” طنجة. ونائب العمدة لـ“كود”: ماكاين حتى مزايدات سياسية واللي وقع نقاش حاد وعادي وكلشي فالآخر صوت على نقاط فجدول الأعمال (تصاور) .
أميمة عطية – كود كازا ///
أثرت نتائج انتخابات 23 شتنبر على دورة أكتوبر لمجلس جماعة الدار البيضاء، اللي بدات هاد الصباح الأربعاء بتأخير تقريبا ديال جوج سوايع، بعدما كانت مبرمجة مع 9 الصباح وما انطلقت فعليا حتى لـ10:40، فحين غابت رئيسة المجلس نبيلة الرميلي، وتكلفات نائبتها مليكة مزور بتسيير الجلسة.
التأخير خلا المنتخبين اللي جاو فالوقت المحدد يدخلوا فنقاشات جانبية، وكان من بينها الحديث على نتائج الانتخابات التشريعية ديال 23 شتنبر والفائزين فيها.
وداخل المجلس، اللي كيسيرو تحالف كيجمع البام والاستقلال والتجمع الوطني للأحرار، بان التوتر بشكل واضح بين مكونات الأغلبية، خصوصا بين الاستقلال والأحرار من جهة والبام والأحرار من جهة تانية.
من بعدما تدخل موسى سراج الدين، عن حزب الاستقلال، وشكك فتوفر النصاب القانوني خلال الجلسة، قبل ما يتدخل محمد غفير عن “الأحرار” وما يخليهش يكمل تدخلو، وهو الشي اللي جر رد من سراج الدين ورئيس فريق الاستقلال مصطفى حيكر.
هاد الواقعة شعلات الكلاشات بين مكونات التحالف، وسط قراءة من بعض الأصوات بأنها مرتبطة بتداعيات نتائج انتخابات شتنبر على التوازنات داخل المجلس.
وفالمقابل، كاينين انتقادات واتهامات سياسية مرتبطة بطريقة تدبير عدد من الملفات داخل المجلس، من الاستقلال وحتى البام، واللي رفضها عضو الأحرار محمد غفير، خصوصا الممتلكات والعقار والصفقات، وسط حديث على تسييس المجلس واختلالات فالتدبير.
وكلاشات الدورة ما سالاتش هنا، بحيث دخل عضو البام عبد الحق الشفيق، المنتخب عن عين الشق، فالنقاش مع محمد غفير.
وفهاد المواجهة، ذكر الشفيق أن حزب البام ديالو تصدر نتائج فانتخابات 23 شتنبر، وأنهم جاو هما اللولين وهادشي كيفرحو قبل ما يرد عليه غفير بالقول إنه كيحترم هاد الشي. والإرادة الشعبية ولكن لمجلس بلاصة تناقش فيها قضايا كازا ومشاريعها.
لكلاشات تزادت من بعد دخلات عضوة من “الأحرار” فالنقاش، وكالت للشفيق:
’’فكو حريرة طنجة بعدا ”، قبل ما تزاد لمشادات بخصوص نتائج الانتخابات، ويتزاد لقيل ولقال وداخل القاعة بأن البام نجح غير بـ“صاك” وأحداث التزوير لي عرفاتها مدينة طنجة.
وفهاد السياق وضح الحسين نصر الله، نائب عمدة الدار البيضاء عن حزب الاستقلال، فتصريح لـ”كود” أن النقاش اللي عرفاتو الدورة ما خاصوش يتفهم على أنه مزايدات سياسية أو بداية تفكك للأغلبية.
وكال نصر الله لـ“كود” إن “ماكاين حتى مزايدات سياسية، اللي وقع نقاش حاد وعادي”، موضحا أن رئيسة الجلسة رفعات الجلسة لمدة حوالي خمس دقايق، وأن بحال هاد النقاشات سبق ووقعات فدورات أخرى.
وزاد نائب العمدة الاستقلالي أن هاد النقاش ما منعش المجلس من مواصلة أشغالو، بحيث صادق المجلس بالأغلبية على بعض النقط المدرجة فجدول الأعمال.
وبخصوص ملف الزبل والنظافة، كال نصر الله لـ“كود” إن الجماعة كتمر من مرحلة انتقالية فهاد الملف، مؤكدا أن الجماعة عاطية اهتمام للقطاع، وأن كازا تبدلات ويمكن تمشي “من حسن إلى أحسن”، خصوصا مع الغلاف المالي المهم المرصود للنظافة.
والدورة الحالية فيها 65 نقطة موزعة على جوج جلسات، وكتهم ملفات مالية وعقارية وخدماتية ورياضية، إضافة لملفات مرتبطة بالنظافة والممتلكات والعقار والباركينغات، ومركب محمد الخامس والعربي الزاولي، فيما كيبقى مشروع ميزانية 2027 من أبرز الملفات المطروحة خلال دورة أكتوبر.
وهكذا، جات أول دورة لمجلس كازا من بعد انتخابات 23 شتنبر فوسط مشهد جديد فرضاتو النتائج الانتخابية.
