أميمة عطية – كود كازا ///

أكثر من 1200 حراك لي رجعو للمغرب، بعدما اختارو العودة الطوعية، من بعد ما بدات السلطات الإسبانية عملية إخلاء وتفكيك مخيم كان مقام فشاطئ “ترمبولين” فسبتة المحتلة، نهار الأحد والاثنين 4 و5 أكتوبر الجاري.

وحسب وسائل إعلام إسبانية، نقلا عن مصادر أمنية، عدد كبير من الحراكة اللي كانو عايشين فالمخيم اختارو ما يدوزوش من مركز المساعدة المؤقتة للأجانب (CATE)، اللي كيتدار فيه تحديد وضعية المهاجرين ومدى توفر الشروط اللي كتسمح ليهم يطلبو الحماية الدولية.

وبلاصة هاد الإجراءات، اختارو يرجعو لبلادهم، بعدما دوزو أكثر من شهرين فسبتة فوضعية غير نظامية.

وحسب نفس المعطيات، سجل نهار الأحد 4 أكتوبر أكبر عدد ديال العائدين، قبل ما يتواصل رجوع المهاجرين البارح الاثنين 5 أكتوبر، مع تسجيل زيادة بـ12 حراك مقارنة بالحصيلة السابقة.

وكانت الشرطة الوطنية الإسبانية بدات نهار الأحد عملية إخلاء مخيم “ترمبولين”، اللي كان كيضم أكثر من 3000 حراك، من أصل حوالي 80 ألف شخص دخلو لسبتة خلال موجة التدفق الجماعي اللي عرفتها المدينة فآخر يوليوز 2026.

وفنفس النهار، حوالي 300 حراك تنقلو لمركز CATE رفضو يخضعو لإجراءات تحديد الهوية، وطالبو بالعودة الطوعية لبلدانهم الأصلية.

وهاد التطورات جات أيام قليلة من بعد رجوع أكثر من 150 حراك كانو كيسكنو فشاطئ “بنيتز”، واللي اختارو حتى هوما العودة للمغرب بدل المرور من إجراءات المعالجة وطلب الحماية الدولية.