أميمة عطية – كود كازا ///

من بعد تدوينة تنشرات فواحد من مواقع التواصل الاجتماعي، ولي كتهضر على تغير فلون ومداق لما ديال شريب الموزع فبلوك 35 بحي سيدي عثمان، خرجات الشركة الجهوية متعددة الخدمات الدار البيضاء-سطات بتوضيح كتأكد فيه أن لما الموزع مطابق للمعايير الصحية المغربية المعمول بها.

وكالت الشركة بحسب معلومات توصلات بها “ كود” ، إن التغير اللي وقع فلون لما ما مرتبطش بجودة ديالو ، ولكن جا بسبب عملية تفريغ قوادس ، اللي دارتها الفرق المختصة باش تصلح مشكل فويت فلما .

ووضحات الشركة الجهوية حسب نفس المصدر ، أن هاد لعملية كتكون ضرورية فاش كيتصارب من بعد لفويت، وأنها ممكن تأثر بشكل مؤقت على لون لما من بعد إعادة تشغيل القناة اللي دارت فيها الأشغال.

وفنفس السياق، أكدت الشركة أن التحاليل اللي تدارَت على لما كشفت على مطابقتو للمعيار المغربي NM 03.7.001 المتعلق بجودة الماء الموجه للاستهلاك البشري.

وشارت الشركة، إلى أن مختبرها المتخصص فتحاليل المياه، لابيلما، حاصل على إشهاد ISO 17.025 من طرف المصلحة المغربية للاعتماد التابعة لوزارة الصناعة والاستثمار والتجارة والاقتصاد الرقمي.

وأكدت الشركة أن مراقبة جودة لما كتدار بشكل صارم 24 ساعة على 24 و7 أيام على 7، انطلاقا من مركز اليقظة والقيادة المركزية، ومن مرحلة وصول الما للخزانات، مرورا بخروجو منها، ووصولا لشبكة التوزيع وتزويد الساكنة.

وزادت وضحات أن المراقبة كتهم، فالحين، عدد من العناصر، من بينها المواد العالقة والكلور وقابلية التوصيل ودرجة الحرارة.