أميمة عطية – كود كازا ///

كتتجه شركة الطيران الإسرائيلية “إسرائير” لتوسيع خدماتها الجوية نحو المغرب، من خلال برمجة رحلتين مباشرتين فالسيمانة بين إسرائيل ومراكش ابتداء من بداية نونبر المقبل، بالتزامن مع تقديم طلب باش تطلق رحلة جوية مباشرة أسبوعية لكازا.

وحسب ما أورداتو صحيفة “جيروزاليم بوست” الإسرائيلية، فالرحلات المبرمجة نحو مراكش غادي تستمر من بداية نونبر حتى بداية يناير المقبل، فحين أن الخط الجوي المقترح بين إسرائيل والدار البيضاء مازال مرتبط بالحصول على الموافقات اللازمة قبل إطلاقو.

وكالت“إسرائير”، حسب نفس المصدر، إنها خدامة على توسيع العمليات ديالها فالمغرب، بحيث كتعتزم تأمين رحلتين كل سيمانة لمراكش، وزيد عليها الطلب اللي تقدمت به لاش دير رحلة مباشرة أسبوعية لكازا .

وكيجي هاد التوسع فإطار البرنامج الجوي الجديد ديال الشركة المرتبط بالمغرب، واللي كيركز حاليا على مراكش والدار البيضاء، مع اختلاف الوضع بين الخطين.

فالرحلات ل مراكش مبرمجة من بداية نونبر إلى بداية يناير، وفق ما نقلاتو الصحيفة عن الشركة، بينما الرحلة المقترحة نحو الدار البيضاء مازال ما تحددش بشكل نهائي موعد انطلاقها، فانتظار استكمال المساطر والحصول على التراخيص المطلوبة.

وبهاد الخطوة، كتكون “إسرائير” كتوسع حضورها الجوي فالسوق المغربية، من خلال إضافة الدار البيضاء إلى الوجهات اللي كتسعى تخدمها مباشرة، إلى جانب مراكش، فانتظار معرفة مآل الطلب المتعلق بالخط الجديد.