رئيس الدولة غادي يطبق الدستور وبتأويل ديموقراطي: تعيين بنت الباشا محتمل بزاف واخا ما فيدهاش .

مصدر الصورة

كود هناء ابو علي ////

سيدنا يقدر يعين فاي وقت رئيس للحكومة او رئيسة للحكومة مكلفة بتشكيلها. سيدنا فهادي غادي يطبق الفصل 47 من الدستور اللي صوتنا عليه باكثر من 77 بالمائة ف2011. هاد الفصل كيقول باللي “يعين رئيس الحكومة من الحزب السياسي الذي تصدر انتخابات أعضاء مجلس النواب، وعلى أساس نتائجها”. طبعا كيقصدو “رئيسة” او “رئيس”.

ايلى شفنا تطبيق سيدنا لهاد الفصل ف3 مرات. راه كان تطبيقو بتأويل ديموقراطي. سيدنا عين ف3 مناسبات من 2012 حتى 2021 رؤساء الحكومات من راس الحزب. كان بنكيران امين عام لحزب العدالة والتنمية ف2012 وتم تعيينو رئيس للحكومة بعد ما حزبو جا اللول.

2016 كان عين سيدنا الامين العام لحزب العدالة والتنمية باش المصباح رحبو الانتخابات التشريعية بنكيران عبد الاله. كلفو يشكل الحكومة. بعد ما فشل فتشكيل الحكومة، كلف الرجل الثاني وكان سعد الدين العثماني =رئيس المجلس الوطني= باش يشكل الحكومة. حافظ على التراتبية. سيدنا بقى حريص على تطبيق هاد الفصل بتأويل ديموقراطي.

ف2021 ربح حزب التجمع الوطني للاحرار الانتخابات التشريعية وعين سيدنا رئيس الحزب عزيز اخنوش فهاد المنصب.

اليوم ربح حزب التراكتور الانتخابات ب97 مقعد والملك غادي يعين منو رئيس الحكومة. ايلى تبعنا نفس النهج، سيدنا محتمل جدا يعين بنت الباشا فاطمة الزهرا المنصوري رئيسة للحكومة.

اييه واخا بنت الباشا ماشي امينة عامة ولكن غير منسقة للقيادة الثلاثية ولكن هي راس الحزب. المشكلة فالحزب اللي ختار هاد الادارة الجماعية وجابو ليهم فوزي لقجع باش يربحو الانتخابات.

من المحتمل جدا يعينها سيدنا باش تشكل الحكومة. ايلى فشلات فهاد المهمة يقدر يعين سيدنا شخصية اخرى. طبعا ايلى كان شي عائق صحي يمنعها من ممارسة مهام رئاسة الحكومة فديك الساعة كلام اخر. اما حيث هي ما فيدهاش فراه ماشي عائق باش ما تعينش رئيسة للحكومة.

خاص الاحزاب السياسية تتحمل المسؤولية. الاحزاب لكبار خاصها امناء عاميين قادرين يكونو رؤساء حكومات او رئيسات حكومات.

الاحتمال القائم هو تكون بنت الباشا رئيسة للحكومة. تقدر تدي لبلاد للحيط. محتمل. حيت ما فيدهاش. صحيا ما تقدرش دير اجتماعات طويلة ومتتالية. ولكن هادي مشكلة الحزب اللي ختارها وبيها ربح الانتخابات. اما ديك الصلاة مع امير المؤمنين ووو، فراه ماشي معيق لاعبينها. لمغاربة صوتو فانتخابات وكيحكمنا دستور