أمولة نوبة...شكون النواب لي مقدروش يحافظو على بلاصتهم وسط القبة .

مصدر الصورة

كود – سلا //

الانتخابات التشريعية اللي دازت نهار لاربعا 23 شتنبر 2026، جابت تغييرات فتركيبة مجلس النواب، بعدما عدد من البرلمانيين كانو كيمثلو المواطنين فالولاية اللي سالات، ماقدروش يرجعو للبرلمان من جديد.

من بين الأسماء اللي غادرت مجلس النواب، محمد عواد عن دائرة سلا المدينة، اللي كان كيمثل حزب التقدم والاشتراكية فالولاية اللي فاتت، ولكن ماقدرش يحافظ على المقعد ديالو فالانتخابات الجديدة.

وفدائرة سطات، كانت انتخابات 23 شتنبر سالات مع 3 نواب دقة وحدة ولي هوما سعيد النميلي، محمد هيشامي والمصطفى القاسمي.

سعيد النميلي، مرشح الاتحاد الاشتراكي للقوات الشعبية، جا فالرتبة الثامنة بعدما جمع 5266 صوت، مقابل 15032 صوت كان جابهم فانتخابات 2021، وبالتالي خسر المقعد اللي كان شاد فالولاية اللي سالات.

حتى محمد هيشامي، اللي كان انتخب فـ2021 باسم الحركة الشعبية، و
دخل انتخابات 2026 باسم الحزب المغربي الحر، وماقدرش يدخل للائحة الفائزين.

أما المصطفى القاسمي ماقدرش يحافظ على المقعد ديالو مني كان انتخب فـ2021 باسم حزب الاستقلال، قبل مايدخل انتخابات 2026 وكيل لائحة الاتحاد الدستوري.

فمدينة فاس، النتائج طيحات برلمانيين كبار من الولاية لي فات ،فدائرة فاس الجنوبية، علال العمراوي، البرلماني من حزب الاستقلال ماقدرش يجدد المقعد ديالو، بعدما جاو قدامو المرشحين ديال العدالة والتنمية والحركة الشعبية والأصالة والمعاصرة والتجمع الوطني للأحرار.

وففاس الشمالية، خرج التهامي الوزاني التهامي، النائب عن التجمع الوطني للأحرار، من القبة، بعدما كان هو اللول فنتائج الدائرة ف 2021.

وفدائرة طاطا، خسر حسان التابي، نائب حزب الأصالة والمعاصرة فالولاية 2021-2026، البلاصة ديالو بعدما اللائحة ديالو ماجاتش ضمن المراتب المؤهلة للتمثيلية فمجلس النواب.

ومن بين الأسماء اللي ماقدراتش ترجع للبرلمان محمد أبرشان، اللي كان لسنوات من الوجوه المعروفة برلمانيا فإقليم الناظور,
النتائج النهائية المنشورة بينات أن الاتحاد الاشتراكي للقوات الشعبية، اللي رشح أبرشان باسمو، جاب 7153 صوت وجا فالرتبة الخامسة، وبالتالي بقى خارج المقاعد الأربعة المخصصة للدائرة.

وفدائرة المضيق-الفنيدق، عبد النور الحسناوي، مرشح الاتحاد الاشتراكي والنائب فالولاية اللي سالات، خسر حتى هو المقعد ديالو، بعدما مشاو المقاعد المخصصين للدائرة لمحمد العربي المرابط من حزب الأصالة والمعاصرة وعصام الفراسي على حزب العدالة والتنمية.

أما فدائرة صفرو، فكان إدريس الشطيبي، النائب على الاتحاد الاشتراكي والنائب الثالث لرئيس مجلس النواب فالولاية 2021-2026، من الوجوه اللي خرجات من البرلمان، بعدما جا فالرتبة الخامسة بـ4843 صوت.
فالمقابل، تصدر مصطفى لخصم، مرشح الحركة الديمقراطية الاجتماعية، نتائج الدائرة بـ19608 صوت.