أثارت تدوينات وشهادات متداولة فـ”فايسبوك” وشبكات التواصل، خلال الأيام الأخيرة، تساؤلات وقلق عند عن عدد من آباء وأمهات الأطفال المصابين بداء السكري، بخصوص وجود خصاص فـ”أقلام الأنسولين” على مستوى بعض المراكز الصحية العمومية.

مصدر مطلع كشف لـ”كود” أن المعطيات المتوفرة للحدود الساعة ما كتأكد وجود حتى شي انقطاع أو تراجع فـالمخزون الوطني ديال الأنسولين. المصدر ذاته أكد أن التحريات اللي تدارت مع الوكالة المغربية للأدوية والمنتجات الصحية ما سجلات حتى شي نقص، والكميات المتوفرة كافية وزيادة باش تغطي الحاجيات كاملة.

وأضاف نفس المصدر فحديثو مع”كود” أن المخزون المتوفر فالقطاع العمومي كايسمح بتغطية الحاجيات المبرمجة للسنة كاملة، بالإضافة لوجود مخزون احتياطي موجه خصيصاً لمواجهة أي ضغط محتمل فـالتموين.

وبخصوص الضجة المثار حول “أقلام الأنسولين” بالتحديد، وضح المصدر لـ”كود” بلي هاد الأقلام أصلاً ما داخلاتش فـمنظومة التوزيع الاعتيادية داخل المراكز الصحية العمومية؛ بحيث كايستافدو المرضى فـالمؤسسات التابعة لوزارة الصحة من الأنسولين على شكل “قنينات” (Flacons) مع الحقن ديالها المخصصة للاستعمال.

وبالتالي، فالصعوبات اللي دواو عليها بعض الآباء فـالتدوينات ديالهم ما عندها حتى علاقة بتموين المراكز الصحية العمومية بالأنسولين، وإنما متعلقة بالتوفر ديال أقلام الأنسولين اللي كايتم التوزيع ديالها عبر بعض الجمعيات، وفق مسارات وقنوات توزيع منفصلة تماماً على المنظومة الرسمية ديال وزارة الصحة والحماية الاجتماعية.

المعطيات المتوفرة حسمات فحقيقة الموضوع وميزات بين جوج حاجات، اولا وضعية مخزون الأنسولين فالقطاع العمومي ما فيه حتى شي خصاص، وثانيا وضحات المشاكل المرتبطة بتوفر “الأقلام” عبر قنوات توزيع أخرى خارج التموين العمومي.