واش لقجع رجع مراد العجوطي للبام؟ رئيس نادي المحامين بان فلقاء فوزي مع الباطرونا وقيادات "الجرار" وطلع لمنصة بوزنيقة وهادي هي الكواليس .

كود الرباط//

هاد الأيام مراد العجوطي، المحامي ورئيس نادي المحامين بالمغرب، بان فواحد اللقاء اللي جمع بين الباطرونا (CGEM) وحزب الأصالة والمعاصرة (البام) بحضور فوزي لقجع. هاد الظهور خلى بزاف ديال التساؤلات تطرح فالصالونات السياسية: واش فوزي لقجع استقطب العجوطي لصف “الجرار” ورجعو للدار؟.

واللي زاد قوى الشكوك هو اللي وقع وول البارح، العجوطي دار كلمة فتجمع خطابي ببوزنيقة إقليم بنسليمان، بحضور لقجع ويونس السكوري. الكلمة كانت شعبية وصفقو ليها الحاضرين، والسكوري ما تسناش وأثنى عليه علنا واعتبرو من الكفاءات. يعني ما بقاش غير حضور فلقاء مغلق مع الباطرونا، ولكن طلوع للمنصة وخطاب قدام الناس.

مصادر “گود” قالت بلي العجوطي ماشي جديد على البام وماشي ضيف شرف، كان من الرعيل الأول وقديم فالحزب، بل أكثر من هادشي كان مع المؤسسين ديال “حركة لكل الديمقراطيين” اللي كانت هي النواة الأولى اللي خرج منها حزب الأصالة والمعاصرة. يعني إلا رجع، راه غير رجع لخيمتو. وزيد عليها أن العجوطي عندو علاقات مزيانة وقوية مع قيادات وازنة فالحزب بحال يونس السكوري وغيرهم، وهادشي كيخلي فرضية “العودة القوية” برعاية لقجع واردة جدا. وزيد أنه ولد بنسليمان وكيعرف الأرض ديالها، ماشي واحد نزل من كازا باش يخطب.

مصدر الصورة

علاش البام غادي يبغي بروفايل بحال العجوطي فهاد الوقت بالضبط؟ الجواب بسيط وفق مصدر “گود” هو المصداقية والملفات الثقيلة لي اشتغل عليها. مراد العجوطي معروف كيتكلف بملفات كبرى وكيدافع بشراسة على القضايا الوطنية والمصالح ديال المغرب فالخارج. وشكون يقدر ينسى الدقة اللي عطا لشركة “أديداس” فملف سرقة الزليج المغربي؟ ولا الشكاية الثقيلة اللي حركها باسم نادي المحامين ضد المعلق الجزائري حفيظ الدراجي؟ وحتى الترافع ديالو فملف السنغال والدفاع على الموقف المغربي أمام الكاف والفيفا. هاد الشخص وجه قانوني معروف، كيدافع على “التمغربيت” بالورقة والستيلو والقانون الدولي.

هاد المصداقية والكفاءة ما جاتش من فراغ، العجوطي عندو مسار دراسي بداه ب باك علوم رياضية، وقرا فالجامعة الرياضيات والإعلاميات، عاد دار شيفت للقانون وشد الإجازة فالقانون الخاص من كلية عين الشق. وما وقفش هنا، زاد كمل “المتريز” فالتدبير المالي والمالية الدولية، وماستر فقانون الأعمال الأوروبي وقانون الاستثمار، وزاد ماستر آخر فالدراسات الأورو-متوسطية. بروفايل كيجمع بين دقة الأرقام وحنكة المحاماة.

واش لقجع بهاد الخطوة باغي يضخ دماء جديدة فالبام ببروفايلات عندها مصداقية وقبول شعبي بحال العجوطي استعدادا للمرحلة الجاية؟ بعد منصة بوزنيقة، ما بقاش السؤال واش غادي يلبس العجوطي التوني ديال البام، ولكن إمتى.