كازاويين داخلين فـ"معركة" من نوع آخر وسط الحملة الانتخابية.. مضاربين مع الواد الحار .

مصدر الصورة

كود- كازا///

فحي المعاريف فكازا، سكان شي زناقي لقاو راسهم داخلين فـ”معركة” من نوع آخر وسط هاد الحملة الانتخابية لي غادي تسالي اليوم مع 12 الليل.. هاد المعركة ماشي مع المرشحين، ولكن مع الواد الحار وريحتو الخانزة.

قوادس الواد الحار تسدو، والمياه العفنة خنزاتهم، حتى دخلات لشي عمارات، وخلفات وراها روايح كاتخنق وضرر صحي متزايد.

هاد السكان اللي المفروض يكونو دابا منشغلين فالتفكير فشكون يحطو فيه الثقة، ويمشيو لمكاتب التصويت باش يمارسو حقهم الدستوري ويصوتو على اللي غادي يمثلهم، لقاو راسهم منشغلين بحاجة اخرى أكثر استعجالا. كيفاش يتخلصو من مياه الواد الحار اللي خنزاتهم.

وهادي أيام والمتضررين فاتصال مستمر مع الشركة الجهوية متعددة الخدمات الدار البيضاء–سطات، ولكن الحل باقي ما بانش، والمياه باقي كتجتاح العمارة.

وحسب ما كيأكدو سكان لـ”كود”، فإن عمال من الشركة جاو لوحدة من هاد الزناقي وعاينو المشاكل لي تبسبب فيها انسداد قوادس الواد الحار، قبل ما يتبين أن الحل كيحتاج تدخل كاميو كبيرة متخصص وهو لي غادي يحل المشكل. غير أن االكاميو، وعلى ما يبدو، مالقاتش الطريق للزنقة حتى لدابا.

الناس لي ضرات من هاد المشكل فكل اتصال بالرقم المخصص للشكايات والاستفسارات، كيتقال ليهم تقريبا نفس الجواب: تم تسجيل الشكاية، والتدخل مستعجل.

غير أن هاد “الاستعجال” غير سمعو بيه ما شافوهش على أرض الواقع.

ومع استمرار الوضع على هاد الحال، كيبقى السؤال بالنسبة للسكان بسيط وواضح، إلى كانت الشركة عاينات المشكل وحددت نوع التدخل اللي خاصو يكون، شنو اللي باقي كيعرقل وصول هاد التدخل وللا هاد الكاميو الكبير للزنقة؟ خصوصا أن كل ساعة كتدوز والما باقي، كيزيد من حجم الأضرار وكتخلي السكان كيتحملو وضع ماشي من مسؤوليتهم.