ارقام. 390 مليار درهم.. لقجع كشف خطة تمويل الدولة الاجتماعية والإقلاع لمغرب السرعة الواحدة فبرنامج البام الانتخابي .

في حال واجهت مشكلة في مشاهدة الفيديو، إضغط على رابط المصدر للمشاهدة على الموقع الرسمي

كود الرباط //

خرج فوزي لقجع، القيادي فـ”البام” وجوكير الميزانية، فـالحلقة الثالثة ديال بودكاست “بوضوح”، باش يكشف كاع التفاصيل المالية ديال البرنامج الاجتماعي والاقتصادي اللي وجد حزبه لخمس سنين الجايا. لقجع حط الكلفة الإجمالية لهاد المخطط فـحدود 390 مليار درهم، موضحاً بلي التقديرات الأولى كانت واصلة لـ350 مليار درهم، ولكن الكلفة طلعت ملي دخلات إجراءات جديدة ومهمة كاتهم بالأساس قطاعي الصحة والتعليم.

وفـ تفكيكو لمصادر هاد التمويل الضخم، بين لقجع بلي الميزانية العامة ديال الدولة غتهز القسط الأكبر بـ314 مليار درهم، بينما الباقي غيجي من الجيوب ديال الجماعات الترابية والجهات والمجالس الإقليمية. وهاد الشي كامل كيجيب هدف أساسي هو تقليص الفوارق المجالية بين المناطق، وتطبيق الفكرة اللي كيدافع عليها الحزب ديال “مغرب بالسرعة الواحدة”، مع الرهان على تحقيق نسبة نمو اقتصادي توصل لـ5 فالمية، وضبط العجز المالي فـحدود 3 فالمية.

لقجع شدد فـكلامو بلي مفهوم “الدولة الاجتماعية” ماخاصهاش تبقا محصورة أو مختزلة غير فالدعم المباشر أو التغطية الصحية الإجبارية. فـنظره، الدولة الاجتماعية هي منظومة متكاملة كتقوم على التماسك والتعايش بين جميع الفئات، مع تقديم برامج خاصة للناس اللي فـوضعية هشاشة باش يتجاوزوا صعوبات الحياة، وتقديم خدمات حقيقية فـالمجالات الأساسية بحال الصحة والتعليم والتشغيل.

وركز الوزير على الشق الاقتصادي والمقاولاتي، موضحاً بلي الفئات المقتدرة والحاملة للمشاريع محتاجة حتى هي لتحرير المبادرة وفتح المجال قدامها فـالاستثمار. وهاد النقطة كاتهم بالخصوص الشباب اللي عندهم تكوين وأفكار واجدة باش تحول لمقاولات منتجة، مؤكداً بلي إعطاء هاد الفئة الفرصة والدعم الحقيقي هو الساروت باش يشاركوا بشكل أكبر فـتحريك العجلة الاقتصادية ديال البلاد.