هضر فوزي لقجع، عضو المكتب السياسي ديال حزب الأصالة والمعاصرة والوزير المنتدب المكلف بالميزانية، اليوم الأحد 13 شتنبر، من إقليم تنغير، على مجموعة ديال الالتزامات الاجتماعية والاقتصادية اللي باغي الحزب يخدم عليها، وكتهم بالخصوص القدرة الشرائية، المتقاعدين، الدعم المباشر، الضرائب، الصحة، الشباب، الماء والطاقة.

لقجع قال بلي «البام» باغي يحول البرنامج ديالو لتعاقد واضح مع المواطنين، أساسُ خدمة الناس وتحسين ظروف العيش ديالهم، كيف ما وضح أن السنوات الخمس اللي فاتت عرفات تعبئة مالية كبيرة وصلات لحوالي 280 مليار درهم، توجهات لعدد من البرامج الاجتماعية، ودعم المواطنين، وتحسين المداخيل، والمساعدات المباشرة للأسر.

ولكن، حسب لقجع، هاد المجهود المالي ما عطاش الأثر اللي كان منتظر، بسبب الارتفاع الكبير فتكلفة المعيشة والاثمنة، الشي اللي خلا القدرة الشرائية تولي من الأولويات ديال الحزب.

وشدد الوزير على أن المواد الأساسية خاصها توصل للمغاربة بأثمنة معقولة، باش المواطن يقدر يشري لي خاص دارو , بلا ما يبقى تحت ضغط مالي كبير. واستحضر فهاد السياق بلاصة «القفة» فالحياة المغربية، وقال بلي التسوق وشراء حاجيات الدار كان مرتبط بالفرحة عند الأسر، والحزب باغي يرجع هاد الإحساس للمغاربة بإجراءات كتحمي القدرة الشرائية.

وبالنسبة للمتقاعدين، قال لقجع بلي الناس اللي دازو سنين طويلة كيخدمو البلاد فمختلف القطاعات ما خاصهمش يلقاو راسهم من بعد التقاعد بمعاشات ضعيفة، كيف ما علن أن «البام» كيقترح رفع الحد الأدنى لانتريت لـ3000 درهم فالشهر.

وفموضوع الدعم الاجتماعي المباشر، اقترح الحزب، حسب لقجع، رفع الحد الأدنى للدعم الموجه للأسر المحتاجة من 500 درهم دابا 1000 درهم شهريا، مع اعتماد الدخل الحقيقي والوضع الاجتماعي للأسرة فعملية تحديد المستفيدين.

وانتقد لقجع بعض المؤشرات اللي كتستعمل فاحتساب الاستحقاق للدعم، كيف ما تسائل على شنو الفايدة من اعتبار تلفون أو بيكالة أو موطور سبب باش تحرم أسرة محتاجة من الدعم ،وقال بلي المعيار الأساسي خاصو يكون هو الدخل الحقيقي.

كيف وضح أن اللي محتاج الدعم خاصو يستافد منو، أما اللي تحسنات الوضعية ديالو وولا قادر يخدم ويحقق دخل كافي، يقدر يخرج من منظومة المساعدة والله يعاونو.

وفالضرائب، قال لقجع بلي الأجراء فالقطاع العام والخاص كيتقتطع ليهم جزء من الأجر ديالهم على شكل ضريبة على الدخل قبل ما يوصلهم الصافي، وأكد أن «البام» كيقترح تخفيف هاد الاقتطاع، باش يطلع الأجر الصافي اللي كيدخل للدار، ويساعد الأسر تغطي مصاريف لولاد والحاجيات الأساسية.

وفقطاع الصحة، أكد أن الإصلاح اللي بدا خاصو يحسن مستوى الخدمات، وشدد على أن المواطن ملي يمشي للسبيطار خاصو يداوا فظروف كتحفظ الكرامة ديالو.

الشباب حتى هو كان حاضر بقوة فخطاب لقجع، اللي شدد على أن تحسين وضعيتهم خاصو يبدا بالتعليم والتكوين ويوصل للإدماج الاقتصادي. وقال إن الشاب اللي عندو الكفاءة ولا الموهبة خاصو يلقى شكون يواكبو ويساعدو.

وفملف الماء، شدد لقجع على ضرورة اعتماد رؤية استراتيجية ودائمة للأمن المائي، وما يبقاش التعامل مع الأزمة بمنطق نستناو الجفاف ومن بعد نقلبو على حلول استعجالية لكل مدينة ولا جهة.

وكشف لقجع على مقترح آخر ديال الحزب موجه للأسر الفقيرة اللي عندها استهلاك محدود لضو، وقال إن الأسرة اللي ما كتفوتش الفاتورة