عطا فوزي لقجع، عضو المكتب السياسي لحزب الأصالة والمعاصرة والوزير المنتدب المكلف بالميزانية، اليوم السبت فأكادير، الخطوط الكبيرة لبرنامج الاقتصادي والاجتماعي اللي غادي يدخل به الحزب انتخابات 23 شتنبر.

وقال لقجع بلي برنامج “البام” كيمشي من واقع المغرب فـ2026 حتى ل 2031، وبكلفة إجمالية كتوصل 350 مليار درهم ف 5 سنين، يعني بمعدل 70 مليار درهم كل عام، مع التأكيد على توفير مصادر التمويل بلا ما يتم رفع الضرائب على المواطنين.

كيف ما وضح لقجع أن إعداد البرنامج الانتخابي بدا من قراءة واقع المغرب والمغاربة فـ2026، ومن بعد تحددات الصورة اللي باغي الحزب يوصل ليها فـ2031. واعتبر أن أي تصور للمستقبل خاصو ينطلق من تشخيص واقعي وصريح للمعطيات الاقتصادية والاجتماعية، حيث إلى كانت البداية مبنية على قراءة غالطة، فالاختيارات اللي غادي تجي من بعدها غتكون حتى هي غالطة.

وأكد أن التوجه العام ديال الحزب كيرتكز على مسار تنموي كيحط تحسين ظروف عيش المواطنين هي اللولة ، خصوصا حماية القدرة الشرائية وضمان بقاء أثمان المواد الأساسية فنيفوات معقولة، مع إجراءات موجهة لمختلف الفئات الاجتماعية.

وتطرق المسؤول الحكومي حتى لمقترح رفع الحد الأقل لانتريت لـ3000 درهم فالشهر، مع مراجعة شاملة للضريبة على الدخل، بهدف الرفع من مداخيل الأجراء. وقال بلي الزيادة ممكن، حسب الأرقام اللي قدم، توصل ما بين 1500 و4000 درهم شهريا، على حساب الوضعية والدخل.

وتوقف حتى عند وضعية الأرامل، وقال بلى وفاة رب الأسرة ما كتعنيش أن مصاريف وحاجيات الدار غادي تسالي، كيف ما ودافع على تمكين الأرملة من لانتريت كامل، باش تحافظ الأسرة على الاستقرار ديالها وتقدر تواجه المصاريف اليومية.

وفموضوع القدرة الشرائية، دعا عضو المكتب السياسي ديال “البام” لإعادة تنظيم مسالك توزيع المواد الأساسية، وضبط العلاقة بين المنتج والمستهلك، بطريقة كتضمن هامش ربح معقول للتجار وتحبس من الغلا اللي كينتج على كثرة الوسطاء وسط سلاسل التوزيع.

لقجع خصص حتى جزء من كلمتو للشباب، واعتبر أن تراكم بزاف من الظروف الاقتصادية والاجتماعية خلق مشاكل كبيرة وسط هاد الفئة. كيف ما علن أن الحزب كيقترح برنامج متكامل الهدف ديالو هو يرجع الشباب لدائرة الإنتاج، وخلق القيمة المضافة، وإبعادهم على الهامش الاقتصادي والاجتماعي.

وفقطاع الصحة والتعليم، قال لقجع بلي طموح الحزب حتى لـ2031 هو توفير خدمات كتجاوب مع انتظارات المواطنين فمختلف مناطق المملكة، مع ضمان استفادة المغاربة من مستوى متقارب فالتنمية والخدمات الأساسية.

وأكد حتى أن الحزب منخرط فـالبرنامج اللي طلقو سيدنا بهدف نقص الفوارق بين المناطق وتحقيق تنمية متوازنة، كيف ما شدد على أن المغرب محتاج لمسار تنموي يمشيًفيه المواطنين كاملين بنفس الريتم ، وبلا ما تبقى شي مناطق ولا فئات كتجري دغيا وشي وحدين كيبقاو لور.

وشدد لقجع على أن البرنامج الانتخابي ديال حزب الأصالة والمعاصرة مبني، حسب العرض ديالو، على حسابات مالية دقيقة. كيف وضح أن الكلفة الإجمالية كتوصل 350 مليار درهم فـ5 سنين، بمعدل 70 مليار درهم سنويا، وأن الحزب حدد مصادر تمويل هاد الالتزامات عام بعام، بلا زيادة الضرائب المفروضة على المواطنات والمواطنين.

واختصر لقجع فلسفة البرنامج فكلمة وحدة: “المعقول”. وقال بلي الحزب باغي يقدم التزام واضح للمغاربة ويتعاقد معهم على تنفيذ الإجراءات اللي علن عليها، باش يقدرو الناخبين من بعد يحاسبوه على شنو تحقق وشنو ما تحققش.

وفالأخير، دعا القيادي فـ“البام” الحاضرين باش يقتانعو بمضامين البرنامج ويوصلوها للمواطنين، وطالب بالتصويت بقوة على مرشحي حزب الأصالة والمعاصرة فاقتراع 23 شتنبر، باش تكون عند الحزب، حسب تعبيرو، فرصة يطبق البرنامج ديالو ويدفع بمسار التنمية للقدّام.