بدا العد العكسي للسباق الانتخابي مع اقتراب موعد 23 شتنبر، وللي هاد المرة تميز بتكسير العظام بين البام والأحرار، وراجع هاد الشيء بالأساس للتعبئة القوية اللي داروها بجوج وللتغطية الشاملة اللي داروها تقريباً لجميع الدوائر الانتخابية على صعيد المغرب.

وفي الوقت اللي أبان فيه حزب الاستقلال على ضعف واضح فالتغطية وما قدرش يستقطب وجوه جديدة، داخلين الأحرار والبام بقوة فاستراتيجية تجديد الاستقطابات؛ فكلما فقد الأحرار شي مرشح، كيعوضوه مباشرة ببروفايل جديد وقوي قادر يجيب المقعد ويكسب الانتخابات فعدة مدن.

الأحرار مراهنين بزاف على الكاريزما والشعبية ديال عزيز أخنوش، وعلى القدرة التنظيمية وشبكة العلاقات ديال عدد من أعضاء المكتب السياسي، وعلى رأسهم رشيد الطالبي العلمي، اللي كيتوفر على شبكة علاقات قوية بزاف مع المنتخبين بحكم تجربته كرئيس للبرلمان لجوج دالولايات، ولأنه حافظ الخريطة الانتخابية عن ظهر قلب ودقيق فالحسابات ديالها.

فالجهة الأخرى، البام غادي بكل ثقله ومخطط مزيان لهاد الانتخابات، وداير جولات ومطوف على المدن كاملة، وهادشي عاونو بزاف جوكير الحكومة فالميزانية فوزي لقجع، للي عندو بصمة واضحة على الاستقطابات الاخيرة وكذلك وضع برنامج انتخابي يعتبر الاقوى حاليا فالساحة، هادشي بان فالداخلة مؤخرا، للي استطاع البام يزيح فيه الاحرار لي تقريبا فقد مقعدو البرلماني فهاد المدينة بشكل نهائي.

وفي الوقت اللي كيدور فيه البام ميدانيا جل المدن والاقاليم، كاين “رجل الظل” فالتنظيم سمير كودار، اللي شاد الحسابات وقاري المشهد مزيان، وداير لقاءات ماراثونية باش يحسب عدد المقاعد اللي غادي يظفر بيها البام، وهي الأرقام اللي كاتبين، لحد الساعة، بلي الحزب ما زال متفوق ومتقدم فالحسابات.

لكن من جهة ثانية، مصادر من الأحرار كترفض هاد التقديرات وكتأكد بلي التجمع الوطني للأحرار ما زال هو الحزب الأول فالميدان، وعندو حظوظ كبيرة باش يحافظ على الصدارة ويظفر بالمرتبة الأولى. وبين اللي كيشوف بلي البام هو اللي غادي يدي الماتش، وبين اللي حاسم بلي الأحرار هما اللي غادي ينتصروا، كيبقى الصراع مستمر ومشتعل حتى لآخر لحظة.

واخا الحملة الانتخابية مغادي تبدا رسميا حتى نهارالاربعاء، لكن هاد المرة بدات بكري بالمهرجانات الخطابية والإنزالات الميدانية لي دارو الاحزاب لعدد من المدن، خصوصا الاحرار والبام للي دارو اكبر عدد من التجمعات الى جانب عبد الاله بنكيران زعيم البي جي دي لي بوحدو غلب المعارضة ف عدد اللقاءات لي نظم، يليه الحركة الشعبية للي دار استقطابات كبيرة بحال حميد شباط وبنتو، ثم الاتحاد الاشتراكي.