سبتة ومليلية اللي مستعمراهم اسبانيا من القرن 15 معبئة الجارة الشمالية كلها وغايبة بشكل شبه كلي عندنا فالمغرب زمن الحملة الانتخابية. باستثناء لقاء حزبي دارو الاستقلال قبل سيمانا هادي، كلشي ساكت.

نزار بركة بعد ما ذكر السبت 29 غشت الاخير باللي الصبليون شريك اساسي للمغرب، شدد على ان الرباط ما غادياش تتنازل على حتى شبر من الوطن فاشارة لسبتة ومليلية وجزر اخرى حداهم.

من غيرو تبعنا لقاءات زعماء الاحزاب الكبيرة فالمغرب فاكثر من لقاء ولا كلمة.

عبد الاله بنكيران الامين العام لحزب العدالة والتنمية جبد لحريك الجماعي ل70 الف مغربي وسول سيدنا باش يفتح تحقيق وكل مرة كيرجع للموضوع لكن ما كيهدرش على سبتة ومليلية المحلتين وما قدم حتى شي اقتراح لمفاوضات مع اسبانيا لاستراجعهما.

الاحزاب الاخرى ما قالت حتى كلمة على المدينتين المحتلتين. غريب هاد الغياب لهاد الموضوع المهم. كانت تجمعات فالناظور فتطوان فطنجة فالحسيمة. كلهم قراب من مليلية ومن سبتة ولكن والى واحد اثار هاد الموضوع.

دابا الموضوع راه هو الطاغي فاسبانيا. شفنا مثول رئيس الحكومة الاشتراكي بيدرو سانشيث فالبرلمان قبل يومين وكيفاش فسابقة اليسار الراديكالي واليمين التقليدي والمتطرف مع الاحزاب القومية الانفصالية كلها كلها بصوت واحد كتسب المغرب وكدافع على اسبانية “سبتة ومليلية”.

شفنا مسيرات فمدن كثيرة دعم لهاد الاحتلال. شفنا ماتشات الكورة ولات مناسبة لهاد الشي. مدرب الصبليون حتى هو مشى لسبتة باش يدعم الاحتلال.

شعب الجارة الشمالية عندو حنين كبير للهيمنة والاستعمار. جوجت المدن فالقارة الافريقية كيتعتابرهم جزء من بلادو.

خاص تعبئة داخلية من الاحزاب ماشي غير لدعم المسيرة الوطنية لدعم مغربية المدينتين يوم 20 شتنبر المقبل بل تعبئة الراي العام لهاد القضتين.

اسبانيا جارة ومهمة لينا ولكن هاد الموضوع خاصو يتطرح فوق الطاولة. خاص اشراك لمغاربة فيه ماشي بحال اللي دارت وزارة الخارجية ديال ناصر بوريطة اللي قالت لوزارة الخارجية الاسبانية بللي بلادنا فتحات تحقيق فموضوع لحريك الجماعي وحنا ما فراسناش. اكثر من ذلك باش بنكيران سول الملك على الموضوع كلشي سبو.

راه موضوع مهم لبلادنا خاص تعبئة كبيرة للجبهة الداخلية. الاستفزازات الصبليونية غادية تستمر. كاينة زيارة لملك الصبليون لسبتة ومليلية وغادية توتر العلاقات بين الرباط ومدريد. عليها خاص الدولة تتحزم بالشعب فهاد القضية الحيوية لمستقبل المغرب