المغرب ما غاديش بسرعين. غادي بسرعات مختالفة وفكاع الميادين. يستحيل نمشيو بسرعة وحدة ايلى ما درناش ثورة ثقافية ايلى ما أسسناش لهاد المغرب بسرعة وحدة لارضية قوية. هادي يومين محامي معروف راجع من المغرب بعد عطلة فالصبليون لقى شي حد قدم راسو راجل شي وحدة كانت معاه. السيدة عندها مستوى ثقافي وهي طبيبة نفسانية.

القضية وصلات للبوليس وكبرات. السؤال واش كانت حالة تلبس بين هاد المحامي المواطن والسيدة؟ اللا. لقاوهم جايين بجوجهم. واش محامي او مواطن عادي ما عندوش الحق يكون مع من بغى فطونوبيلتو؟ كلشي غريب وعجيب وخطير.

قاليك راجل السيدة كان متبعها وباش دخلات قال ليها كنتي معاه ووو. هاد الشي كولو ما كاينش حالة التلبس. ما حاضراش.

راه وزير العدل عبد اللطيف وهبي قالها كثر من مرة والاصوليين والاسلاميين خاصة الاخوان منهم ناضو ليه. ماشي غير حيت عندهم مشاكل جنسية وطاحو فاكثر من فضيحة، اللا. قال ليك غادي يخرج على الاسرة المغربية. هادو اسلاميين منافقين. هما عارفين لو ان المغرب طبق اللي جا فالاسلام فهاد الموضوع ما يبقى يبرگگ حد ما يبقى حد يثبت الخيانة. خاص هاد الراجل يجيب شهود ومعاهم الخيط ويدوزه عاد يقول راها خيانة او لا. اسيدي وهبي يقول ليهم نطبقو غير هاد الشي فقضية العلاقات الرضائية ونتهناو بالمرة.

راجل مع مرا بالغين وما كايناش علاقة تراتبية فالشغل يدبرو ريوسهم. واش هاد البوليس اللي تم تعبئتو مع الوكيل وغيرو ما عندهم ما يدار؟ راه بلادنا محتاجاهم فقضايا اهم كتهم الامن والاستقرار.

جوج راشدين يديرو ما بغاو. يمارسو الجنس ما يمارسوهش. شغلهم هادا. علاش ندخلو لبيوت النعاس. فقضية المحامي القضية اخطر. اييه مشاو فاسبانيا وعاشو الحياة. ومن بعد. واش كاين شي دليل على هاد الشي؟ علاش الوكيل او غيرو يحشرو ريوسهم فامور النيك والجنس بين بالغين وخارج لبلاد.

هاد العبث خاصو يتسالى وهاداك النقاش الاخواني خاصو يتفرش. خليو الناس يتحابو وحضيو مع الدواعش اللي باغية تقطع الريوس والسراق اللي كينهبو سواء فمنصب المسؤولية او فالصفقات العمومية وغيرها او فالضرائب. عطيو التيقار لكل واحد كيمارس الجنس بلا استغلال بلا عنف بحب وعشق