حسب موقع اللوائح الانتخابية المغربية وحسب المندوبية السامية للتخطيط راه في المغرب الأغلبية ديال المشاركين في الانتخابات هوما الشراف الأميين لي كيعيشوا الهشاشة وكل مكان المواطن قاري أو صغير أو لاباس عليه راه مكيشاركش في الانتخابات. .

محمد سقراط-كود///

بحكم أن المغاربة ديما كانوا شعب أمي ماقاريش حتى جات فرنسا وقراتنا، فراه ديما كان عندنا تقديس مبالغ فيه للشياب لأنهم حملة الحكمة الشفهية، وخزان للذاكرة، وهادشي علاش ذاكرة المغاربة قصيرة لأنها ارتبطت بالتعاويد والخبير عوض التوثيق، ولحد الآن باقين الشياب هوما لي كيسيرو البلاد هوما لي كيصوتوا في الانتخابات وينجحوا فيها ويسيرو المجالس الجماعية، وبرلمانيين على عدة مناطق، وبحكم أن التقنية والمعرفة مشات بسرعة في هاد القرن فراه عادي جدا، الشياب ديال الدول المتقدمة ومقدروش يواكبوا مابقى غير الشياب ديال دولة شبعانة أمية أغلبهم متدين كيآمن بحياة مابعد الموت فيها الجنة وخالية من المشاكل، وكل مايلزم لها هو شي حجة لقبر النبي وهانتا ضمنتي الأبدية، إنسان بحال هذا تجي تقوليه هاكيفاش بغينا نشوفوا المغرب في المستقبل، هو ماسوقوش الدنيا زائلة باغي غير ياكل ويشرب ويتداوى حتى يدي مول الأمانة آمانتو.

حسب موقع اللوائح الانتخابية المغربية أكثر فئة عمرية تسجيلا في اللوائح هي من 55 عام لفوق وأقل فئة هي من 18 لـ34، وحسب الإحصائيات الأخيرة ديال الحليمي راه أكثر من نصف الشياب المغاربة أميين، كثر من خمسين في المية رجال وكثر من سبعين في المية دالعيالات، والنسبة ديالهم كتزاد بلا ماتحسن الظروف ديالهم، وأغلبهم كيعاني الهشاشة، هادشي احصائيات المندوبية السامية للتخطيط ماشي هدرتي، يعني في المغرب كتدار انتخابات لي غادي تحدد مستقبل المغرب أغلب المشاركين فيها من الناس الكبار الأميين الفقراء، بينما كاين عزوف شبه كامل من طرف الشباب، واش هادشي صحي اجتماعيا وسياسيا الدولة، واش معندك مفكرين او مخططين او علماء اجتماع وسياسية واقتصاد يعطيوك حلول منطقية وناجعة لهاد الحصلة.

دابا في المغرب كل ماكنتي صغير في العمر ومقبل على الحياة وعندك طاقة للتغيير ومطالع على العالم وقاري وفاهم غادي يكون احتمال انك تشارك في الانتخابات شبه منعدم، كل ماتزادت قرايتك وفلوسك ونتا كبير في العمر كل مافقدتي الثقة في الانتخابات، وهادشي راه عكس الدول في العالم سواء الفقيرة او الغنية تقريبا، الدول لي بحالنا ودازت من شنو دزنا وتقاتلات ونجحات بحال ماليزيا كمثال ودول أخرى في شرق آسيا او شرق أوروبا، كتلقى الشباب مهتمين ومتفاعلين مع السياسة وكيمارسوها، حيت عارفين أنهم الفئة الأكثر تأثرا بالقرارات السياسية، واحد شيباني متقاعد او غير كالس جنب الجامع حتى الى صوت على شفار او أمي او مكلخ او فاسد، فالأثار ديال السياسات والقرارات ديالو ماغاديش تأثر بزاف على حياتو وماشي لمدة طويلة، على عكس الشباب أي قرار غالط كيأثر على حياتهم لستين عام الجايا، وحسب المؤشرات راه الانتخابات الجايا ماغاديش تكون استثناء.