اختارت نادية فتاح، عضو المكتب السياسي لحزب التجمع الوطني للأحرار، البارح الجمعة، تشبيه كروي لافت باش ترد على منتقدي حصيلة الحكومة، معتبرة أن اللي ما شاركش فالتدبير ديال الشأن العام ما يمكنش يقيّم الحصيلة بنفس المنطق ديال اللي “لعب الماتش فالملعب”.

وقالت فتاح، خلال اللقاء التواصلي ديال حزب التجمع الوطني للأحرار بوجدة، إن بعض الأطراف “شافت الحصيلة من المدرجات”، فحين أن أعضاء الحكومة والحزب عاشو تفاصيل العمل الحكومي من موقع المسؤولية.

وأضافت: “كاين اللي شافها من المدرجات، ما عندوش حصيلة، ما شافهاش وما عارفهاش”، قبل ما تؤكد أننا كأعضاء الحكومة “لعبنا الماتش فالملعب، عرقنا، جرينا، وتقاتلنا، وما زلنا كنجرّيو”.

واعتبرت القيادية التجمعية أن ممارسة الحكم ماشي مباراة بلا أخطاء، مشيرة إلى أن اللي كاين فالميدان يقدر ينجح، ولكن يقدر حتى يخطأ أو يتعرقل أو “يطيح”، معتبرة أن هاد الشي ما كيلغيش وجود حصيلة يمكن تقييمها بالأرقام.

وفهاد السياق، استعرضات فتاح عدد من المؤشرات اللي قالت إنها كتعكس نتائج العمل الحكومي، من بينها بلوغ نسبة النمو 5 فالمائة، والزيادة فالحد الأدنى للأجور بنسبة 20 فالمائة، والرفع من الحد الأدنى للأجور فالقطاع الفلاحي بنسبة 25 فالمائة، بالإضافة إلى مضاعفة ميزانيتي الصحة والتعليم.

وشددات على أن هاد الأرقام ماشي غير معطيات تقنية، ولكن عندها انعكاس مباشر على المواطنين، متسائلة على اللي كيتخلص الحد الأدنى للأجور واش ما حسّش بالزيادة اللي استفد منها.

وفالمقابل، أقرت فتاح بأن الحصيلة ما كتعنيش أن جميع المشاكل سالاو، مؤكدة أن السياسة كتفرض التواضع والاستماع للمواطنين اللي كيقولوا إن الحقوق ديالهم ما وصلاتهمش.

وتابعت أن المغرب حقق نجاحات، ولكن المطلوب فالمرحلة المقبلة هو توسيع هاد النجاحات وتعزيزها، وهو ما قالت إنه كيشكل الخلفية ديال برنامج الحزب “الكرامة وفرص للجميع”.