علاش ماعمرك غاتلقى شي سعودية ولا شي قطرية ولا شي هولاندية ولا حتى شي كاميرونية كاتقول اللهم الزّهو والا زواج القهرة؟ وا جاوب آ المجتهد ؟ حيت لي زرعتيه كاتحصدو! الحگرة والقهرة وقلّة شّي والديكالاج بين شنو نتا باغي تفرض على المرا و شنو قادر تعطيها فالمقابل هادشي لي خلا العيالات يفضلو الزّهو على زواج القهرة .

مصدر الصورة

سهام البارودي – كود//

شي وحدين تحسّسوا من ديك الأغنية ديال “اللهم الزّهو والا زواج القهرة” و نوضو الصداع على المغنية كريمة غيث و ناضو طبعا حرّاس الفضيلة لي مساليين قبّهم قالّيك بغاو يدعيوها !
ايوا دعيو معاها گاع المغربيات لي كايرددو هاد الأغنية و شدّونا كاملين نتوما گاع ! وا زوينة هادي، حتى الغنا و الهضرة شي وحدين مابقاوش باغينا نهضروها !
وا لا كنتي سيدي و مولاي، عوض أنك تتحسّس من الأغنية، سول راسك علاش العيالات كايغنيوها ؟ شنو لي غايخلي المرا المغربية توصل لهاد الاستنتاج ديال “اللهم الزّهو والا زواج القهرة” و تبدا تتغنى بيه فالحفلات و المناسبات ؟
علاش ماعمرك غاتلقى شي سعودية و لا قطرية و لا حتى كاميرونية افريقية كاتعاود هاد اللازمة ؟ وا جاوب آ المجهتد ؟ حيت توسامبلومون المغربيات اليوم كاينتافضو على واحد الماضي ( وحتى الحاضر) المليئ بالحگرة و القهرة و العنف من الراجل و عائلة الراجل، حيت القهرة كاينة، ملموسة، كانشوفوها و حضرنا ليها ! القهرة كاينة فالديكالاج بين شنو كايطلبو بعض الرجال المغاربة من عيالاتهم، و شنو قادرين هوما كرجال يقدمو ليهم !
كاين مشكل الا كنتي نتا باغي المرا تكون زوينة و طويلة و شهبة و حادگة و تبغي مّك و خواتاتك و لكن فالمقابل نتا كاتقدّم ليها غي الزلط و قلّة شّي، و باغيها تكون “صبّارة” باش تسمى “بنت الناس” ! مايمكنش هادشي آ سّيموحمد راه فحالا مشيتي لاميزون ديال بورش و قلتي ليهم عطيوني بورش بثمن ضاسيا ( مع عدم احترامي لا للبورش لا للضاسيا) !
واش ماكاتشوفش بلي خاص تكون قد فمّك قد دراعك ؟ نتا باغيها يكون عندها غوز و لكن فنفس الوقت لاطلبات ليك عشرالاف درهم باش دير لازير كاتسمى ماشي بنت الناس ؟ نتا باغيها تكون زوينة و مهلية فراسها و لكن فنفس الوقت كاتجيك ثلتميات درهم ديال الظفار فجوج سيمانات غالية و ميات درهم للبروشينغ بزاف و لاش السكين كير و لاش دوك الحوايج ياك عندك الحوايج ؟ باغيها ماتخدمش و تجلس فالدار تقابلك و تقابل ولادها و لكن فنفس الوقت نهار نتا تموت يدخلو خوتك يجريو عليها هي و بناتها من الدار ؟
باغي بزاف و لكن قابل انك تعطي غي شوية ! و هنا راه هضرنا غي على الجانب المادي بلا مانهضرو على الجانب النفسي و العائلي و گاع دوك ليزوبسيون لي بغيتيهم يكونو فديك المرا باش تتسمى بنت النّاس و نتا ماعندكش القابلية باش دير ادنى مجهود باش تكون تانتا ولد النّاس !

اليوم المغربيات كايقولو باراكا للقهرة و براڤو عليهم، و مؤسسة الزواج لاماكانتش غاتوفر الراحة و الحب و الاحترام للمرا، الله ينعل بوها مؤسسة و الله ينعل بوه زواج ! يا الله !