هاد الأيام واحد الشابة من هادوك لي وصلو لسبتة، دارت تصريح لشي صحافي، قالت فيه بلي هي هربانة من المغرب، حيت ماقاداش تعيش فيه بالحرية ديالها، تلبس لي بغات، وتخرج فين ما بغات.
هاجموها بزاف ديال المغاربة، بدعوى انها زادت فيه، وللامانة زادت فيه، وخصوصا فاش صحاب الحسنات وصلو للأنستغرام ديالها، ولقاوها كانت عايشة حياتها طوب، لا ماديا، ولا في ممارسة الحرية الفردية ديالها.
انا ما ضدها، ولا معاها، حيت من جهة هي كذبات، ولكن من جهة أخرى الله اعلم بعلاش كدبات، وممكن وقع ليها مشاكل في الأسرة من بعد دوك الصور السعيدة في الانستغرام، وتبدلات حياتها للأسوء.
ما علينا، الله يسهل لكل واحد لي فيه الخير. وهاد الخير نبيغاواه فبلادنا، لا على مستوى المادة، ولا على مستوى الحريات الفردية والجماعية.
المشكل في ان هادوك لي هاجمو البنت، لأنها قدمات صورة مغلوطة على بلادنا، وقالو بلي المغرب ماشي هو قندهار، هوما نفسهوم لي هاجمو كريمة غيث فاش غنات في تطوان: اللاهوما الزهو ولا زواج القهرة.
وقالو بلي هادشي فيه دعوة للانحلال الأخلاقي.
ودابا واش المغرب ماشي هو قندهار، ولا المغرب هو لي ماخاصش يكون فيه الزهو؟
هاد الاغنية أصلا سبقلي سمعتها شحال من خطرة، يعني قديمة.
وسمعتها حتى فالعراسات، والعريس والعروسة ناشطين وهوما كيضحكو على الكلمات.
معرفتش علاش حتى وصلات لمهرجان في تطوان عاد رجعات مشكل.
أنت اخويا او اختي، معندكش ما الزهو، او ما لقيتي ليه الطريق، وقلتي عنقود العنب حامض، حيت ما قدتيش توصل ليه، شغلك هاداك، والله يعاونك على الطريق الصحيح لي عند بالك.
والحمد لله هاد الصيف في المغرب بانو شحال من زاويات وشحال من شيوخ، سير ليهوم أخويا، واعتكف ليك، وخلي البشار لي عندو اختيارات أخرى في الحياة طرانكيل.
هو أصلا حتى دوك الزوايا قلبوها عبادات بالزهو، عبادة لايت بالحضرة والماكلة والحديد الواعر والرقص.
الزهو عند المغاربة من ديما هو النشاط، هادشي من بكري، كيستقبلو بداية السنة الفلاحية بالقصاير، وهي القصاير نيت لي كيديروها الوقت لي كيساليو الحصاد.
حتى في العلاقة بينهوم وبين أولياء الصالحين موالين المكان، الموسم السنوي كيكون فيه الذكر والشيخات بزوج.
دابا غيجي بنادم راسو مربع بتخوانجيت المنافقة، يحاول يردنا لزمان الجاهلية.
الجاهلية، نعم، حيت الجهل هو بنادم ميدخلش فسوق راسو، ويحاول يتدخل في حياة الناس، والجاهلية هي تكون ضد الزهو.
الزهو ما عندو علاقو بالتقدم والتأخر، الأوروبيين والميريكان زعماء الزهو والنشاط، وفنفس الوقت هوما زعماء العلم والدمير والخدمةـ حيت كل حاجة كيديروها فوقتها وبقواعدها.
كريمة غيت ما قالت غير الحق: اللاهوما الزهو ولا زواج القهرة.
هي أصلا ما قالت حتى حاجة ضد الزواج، هي دوات على زواج القهرة.
زواج المشاكل، والنكير، وطرف يحاول يتحكم في الطرف الآخر، والحزقة.
راه بالفعل، بنادم يبقى سيليباتير وعايش الحياة أفضل من زواج بحال هادا.
وهادشي ماشي غير للمرا، حتى للراجل.
بمعنى المرا لي كانت عايشة الزهو وتزوجات زواج القهرة، فراها تقولبات تقوليبة العمر، وكذا الرجل لي كان عايش الزهو، ومن بعد تزوج زواج القهرة.
ونمشي معاكوم بعيدة كاع، وكاين الزهو لي احسن من الزواج كاع.
بنادم بغا يبقى ديال راسو، ومن حقو.
ما باغي لا ولاد، لا مسؤوليات، لا فريع الراس،
واش ماشي من حقو، او ماشي من حقها؟
فين آذاوكوم؟
وكاين مشكلة أخرى، هو واحد عزيز عليه الزهو، وكيتزوج واحدة عزيز عليها الزهو حتى هي، ومتفاهمين مع بعضهوم.
خدامين على راسهوم، وكيقصرو مع بعضهوم في النايت كلوب وما جاورهم.
ما كيخلص عليهوم حد، ما كيآديو حد، ولكن بنادم تابعهوم.
هاداك ماشي راجل، كيفاش مخلي مرتو تلبس داك اللبس، وفي العمارة بنادم يشوف فيهوم شوفة ناقصة، والعيالات كيقولو بلي المرا موكلاه مخ الضبع.
راه بالفعل، المغرب صعيب تعيش فيه حياتك الخاصة، وتمارس فيه الحرية الفردية ديالك بهدوء.
المشكل ماشي في الدولة فقط، المشكل في المجتمع اكبر.
الدولة ما قدراتش تحيد شلا قوانين رجعية خوفا من المجتمع، واخا كتميك في اكثر الأحوال.
ولكن إذا المجتمع دار فوضى رجعية، مغديش تعقليك عليك الدولة.
تعتقلك انت وصاحبتك من شقة نتوم سادين عليكوم فيها مثلا، أو تدير شي حملة تطهيرية في حق البنات لي خارجين من البيران والديسكوتيكات، غير باش تسكت الخوانجية.
بغيت نفهم حاجة واحدة، البلاد فيها الجوامع في كل بلاصة، المسافة بين جامع وجامع أقل من المسافة بين فرماصية وفرماصية، والمجالس العلمية خدامة، وشلا جمعيات دينية وخطب ومواعظ، والدولة دايرة حتى غذاعة وقناة خاصة بالدين.
هادشي مزيان، يعني لي بغا يصلي ويعبد ويولي ولي الله كاع، ما حبسو حد.
وهاد الشي كيعني بلي ما كاين حتى حرب ضد الدين فالمغرب.
الدين كاين في المدرسة من التعليم الأولي حتى للثانوي كمادة للتدريس، وهو الامر لي ماكاين فبزاف ديال الدول,
يعني الدولة بشكل مباشر وغير مباشر كتشجع على التدين.
فواش هادشي ما كافيش الخوت، وباغيين الدولة تدخل الناس صحة أفواجا للجوامع، وتهدم البيران، وتجلد صحاب الزهو في الساحات العامة.
راه العكس هو لي كاين في المغرب.
أنك مثلا تمشي للجامع وهادشي زوين، ما غاديش تخاف من المخزن، صلي حتى الفجر، وما تخاف إلا من شي حد يكرسيك، وهاداك لي غيكرسيك براسو كيقول الشتا ما كاطيحش بسبب النسا عراو راسهوم.
لكن فاش ناس الزهو كيمشيو لبلايص الزهو، فممكن يتشدو لبزاف ديال الأسباب كاينين في القانون الجنائي: ها قوانين كتمنع تقديم الخمر للمسلمين، ها تجريم العلاقات الرضائية، ها فصول فضفاصة ديال الإخلال العلني بالحياءـ وزيد وزيد من القوانين لي كتضيق على الحريات الفردية.
وفي الأخير كيقوليك: الدولة تشجع الانحلال وتحارب الأخلاق، طبعا الانحلال والاخلاف بالمفهوم ديالهوم.
هاد البلاد ديالنا كاملين، والدولة والقوانين ديالها خاص يكونو محايدين فيما يخص الاختيارات الخاصة ديال الأفراد مادام ما فيها اذية لحتى شي حد، غير لي نفسو ضيقة وكيعتبر انه عندو حق على حياة الآخرين.
ياك ياسين العمري عندو جمهور، وكيطلع للمنصة معبس، وكيقول لجمهور معبس أن البنت إذا طلبوها للزواج، خاص تزوجوها واخا تكون قاصر،فعلاش متضايقين ان كريمة غيث طلعت حتى هي للمنصة وهي ناشطة، وقال امام جمهور ناشط: اللاهوما الزهو ولا زواج القهرة.
واش تقهرتو بالزواج وباغيين تنكدوها على صحاب الزهو.