شركة “ريضال” دارت مؤخراً تدخل باش تصلح مشكل ديال الضو فواحد من الأحياء الراقية فالرباط، ولكن الطريقة اللي تدار بها هاد الإصلاح خلات وراها واحد الديكور اللي ما كيتناسبش لا مع طبيعة الحي ولا مع الصورة اللي كتقدم بها الرباط راسها كمدينة منظمة وعصرية.

العطب الكهربائي بطبيعة الحال خاصو يتصلح، وما كاين حتى نقاش فهاد النقطة، ولكن المشكل، حسب الصور اللي توصلات بها “ݣود”، ماشي فالإصلاح وإنما فالطريقة اللي تسالات بها الأشغال، كابلات وأسلاك دازو فوق واجهات العمارات بشكل عشوائي، وبقاو مدليين وباينين ، بلا ما يتخباو على الما وعلى الناس لي تقدر تهدد سلامتهم كيف ما متحتارمش جمالية البنايات.

واللي كيزيد يطرح علامات استفهام هو أن بعض هاد الكابلات دايزين قراب بزاف من الشراجم والبيبان، والتوصيلات باين عليها أنها تدارو بالخف، بحالا الغرض غير يتصلح الضو، بلا ما يكون اهتمام كيفاش غادي تبقى الأشغال من بعد ما يرجع الضو؟

حتى البوسط ديال الضو، حسب المعاينة اللي كتبيّنها الصور، ما كيعطيش الانطباع ديال تدخل مهني ، كيف ما كيخلي واحد السؤال , واش هاد الشي غير حل مؤقت حتى يتعاود التدخل، ولا أن سكان الحي غادي يبقاو عايشين مع هاد الكابلات فوق واجهات العمارات؟

الناس لي تشكاو لݣود قالو أن الخدمة العمومية ما كتساليش غير ملي كيشعل الضو، كاينة السلامة، كاين احترام الواجهات، كاين التنظيم، وكاين حتى أبسط قواعد النظافة والأمان من بعد الأشغال، إلا كان العطب مستعجل، مفهوم أن الشركة خاصها تتدخل دغيا، ولكن ماشي الفنيسيون تكون بشكل عشوائي.

والسؤال هنا ماشي غير موجه لـ”ريضال”، ولكن حتى للجهات اللي عندها مسؤولية المراقبة وتتبع الأشغال فالمدينة. شكون كيراقب هاد التدخلات؟ واش من بعد ما كتسالي الخدمة كاين شي حد كيرجع يشوف واش كلشي رجع كيف كان؟ واش الشركات كتتحاسب على طريقة الأشغال وعلى الحالة اللي كتخلي ، ولا غير على أنها رجعات الضو الكهربائي؟