عرف اللقاء التواصلي اللي ترأسو محمد أوزين، الأمين العام ديال حزب الحركة الشعبية، البارح الأربعاء فمدينة فاس، للإعلان على سميات المرشحين ديال الحزب فدوائر الجهة، واللي من بينهم حميد شباط و بنتو البرلمانية ريم شباط، اللي كانت استقلات مؤخراً من حزب جبهة القوى الديمقراطية اللي كانت كتمثلو فالبرلمان، والتحقو كاملين بالحركة الشعبية.

وفنفس اللقاء، تعلن رجوع أسماء سياسية معروفة لمشهد السياسي، من بينها امحند العنصر، وزير الداخلية الأسبق والأمين العام السابق ديال الحركة الشعبية، اللي غادي يترشح فدائرة بولمان بلاصة ولدو حسن العنصر.

وكان من بين الملتحقين بالحزب حتى حميد شباط، الأمين العام السابق ديال حزب الاستقلال، واللي رجع للواجهة السياسية من بعد سنوات ديال الغياب، خصوصاً مورا ما تعزل هو ومراتو من عضوية جماعة فاس فدورة ماي 2024 بسبب التمناك، بعدما كان انتاقل يعيش برا المغرب و وزيد عليها طردو من حزب جبهة القوى الديمقراطية، اللي سبق وترشح باسمو وكان بغا ياخد القيادة ديالو.

حزب الحركة الشعبية زكّى حتى بنتو ريم شباط وكيلة للائحة فدائرة فاس الشمالية، وهادشي جا أيام قليلة من بعد ما قدمات استقالتها من مجلس النواب، اللي كانت عضوة فيه باسم جبهة القوى الديمقراطية ،وكانت ريم شباط وعائلتها التحقو من قبل بحزب الزيتونة ف 2021، قبل الانتخابات.

الحركة الشعبية كتعول على الشعبية ديال حميد شباط وعائلتو فمدينة فاس، خصوصاً أنه سبق ليه ترأس المجلس الجماعي للمدينة لجوج ولايات متتاليات، وبقى برلماني عليها لمدة 20 عام، باش يقدر الحزب يربح مقعد برلماني.

أما امحند العنصر غادي يرجع ينافس على المقعد البرلماني اللي كان خدا من سنة 1993، قبل ما يسلم الكرسي لولدو، العنصر سبق ليه تقلد بزاف ديال المناصب الحكومية فعهـد الملك الحسن الثاني، من بينها البريد والمواصلات، والفلاحة، ووزير دولة، والداخلية، والتعمير، إضافة لمسؤوليات أخرى، من بينها رئاسة جهة فاس مكناس.

العنصر، اللي كان سبق ليه قال فواحد البرنامج الإذاعي بأنه غادي يعتزل السياسة من بعد 60 عام ديال الممارسة، قرر دابا يرجع للساحة ويترشح فدائرة بولمان، اللي فيها 3 مقاعد برلمانية، وغادي ينافس فيها عدد من الأسماء، من بينها محمد شوكي، رئيس حزب التجمع الوطني للأحرار، ورشيد حموني، رئيس فريق التقدم والاشتراكية بمجلس النواب.