شرع اليد فحق المثليين ففاس.. البوليس شدو واحد من المتورطين وها تفاصيل الأحداث اللي عرفها حي ليراك .

مصدر الصورة

أسماء غربي – كود////

البوليس خرج ببيان رسمي كيشرح فيه شنو كان البارح وخلال الساعات الاولى من صباح اليوم الخميس فحي ليراك الشعبي، بعدما ناضو صداع بين شي مثليين وسكان فداك الحي اللي دارو شرع يديهم وتعداو على هاد المثليين.

طبعا البوليس تدخل باش يفرض النظام العام حقاش كان صداع كبير، وباش يعرف بالضبط شنو واقع. وحسب رواية البوليس فإنه تم توقيف 9 أشخاص وفيهم جوج قاصارين بسبب ارتكاب أفعال مرتبطة بالتخدير وإلحاق خسائر مادية بملك الغير وزيد عليها الإخلال العلني بالحياء.

البوليس قالو باللي توصلوا بإشعار من هاد الساكنة على وجد تجمع مراهقين حدا هاد المنزل اللي كارينو فالحي باش يديرو افعال إباحية وزيد عليها الصداع الليلي، وغيرها.

دبا كاين 6 من داك المثليين فالحراسة النظرية بتعليمات من النيابة العامة بسبب هاد الاحداث اللي وقعات، وكاين جوج آخرين منهم تحت المراقبة حقاش قاصرين، فيما تم توقيف واحد من داك السكان اللي دار شرع اليد وتعدا عليهم ومخاصش القضاء يفلتو باش يكون عبرة لهدا اللي كيديرو شرع اليد.

دبا القضية غادي تعرض على النيابة العامة. كاين رواية ديال السكان كيقول باللي هاد المثليين كانوا كيتعطاو للمخدرات وكيديرو الصداع بزاف فالحومة والناس مابقاش تنعس وافعال اخرى، وهادشي كان داخل شي منزل كارينو هاد المثليين من طرف شي حد مشدود دبا فالحبس على ود قضية أخرى.

وحسب المعطيات الأمنية، فقد كانت هاد القضية موضوع تسجيلات وفيديوهات تم تداولها على مواقع التواصل الاجتماعي.

وتم وضع المشتبه فيهم الراشدين تحت تدبير الحراسة النظرية، فيما تم الاحتفاظ بالقاصرين تحت المراقبة، رهن إشارة البحث القضائي اللي كتشرف عليه النيابة العامة المختصة.

وكيهدف هاد البحث إلى الكشف عن جميع ظروف وملابسات القضية، وكذا تحديد الأفعال المنسوبة لكل واحد من المعنيين بالأمر.

نشوفو دبا قرار النيابة العامة شنو غادي يكون بعد الانتهاء من البحث القضائي لي كتشرف عليه هي باعتبارها الجهة اللي كتحمي الحقوق والحريات.