كازا.. المحامين تكرهو وغادي يرجعو يخدمو فشتنبر وخا جمعية هيئات المحامين باقا شادة فالإضراب.. ومحامي لـ “كود”: طلع لينا الدم وبحالي عدد كبير غادي يرجعو للمحاكم .

منذ

أميمة عطية – كود كازا///

جمعية هيئات المحامين بالمغرب غاديا فالتصعيد وطالبا من كاع المحامين يبقاو شادين فالإضراب وشل المحاكم، ولكن فكازا الأمر مختلف، من الواضح أن عدد منهم عيا وناوي يرجعو لمحاكم الشهر الجاي.

وحسب ما كشفت عليه مصادر مهنية لـ”كود”، عدد كبير من أصحاب لبسا لكحلا فالعاصمة الاقتصادية “طلع ليهم الدم” وقررو يرجعو للخدمة مع الدخول القضائي فشتنبر، وما غاديش يتسناو قرارات التمديد.

وحسب ما صرح بيه محامي بهيئة كازا لـ”كود”، واللي ما بغاش يكول اسمو، باللي غادي يرجع يخدم وبحالو عدد كبير، فهو شخصياً غادي يرجع يخدم شهر جاي يمارس مهامو.

وكال المحامي لـ”كود”: “طلع لينا الدم من هاد الوضع، وبحالنا عدد كبير غادي يرجعو يخدمو، حيت كاينين ملفات ديال ناس معلقين وحقوق ديال الموكلين واقفا، وما يمكنش نبقاو حابسين مصالح الناس والمساطر القانونية ديالهم”.

وزاد ضاف لمصدر نفسو، أن استمرار هاد الوضع ولى صعيب، خصوصاً بحيت كاينين ملفات مرتبطة بآجال وإجراءات قانونية، وماشي كلشي يقدر يبقى واقف وهو ما دفع عدد من المحامين، ياخدو قرار الرجوع للخدمة مع بداية شهر جاي.

وللإشارة فقط، فهاد المعطيات جات فالوقت اللي مازالت فيه جمعية هيئات المحامين بالمغرب متشبثة بالتصعيد، بحيت عقد المكتب التنفيذي ديالها اجتماع عادي فالرباط لبارح التلاثاء 18 غشت 2026، وناقش المستجدات المهنية ومشروع قانون مهنة المحاماة، قبل ما يجدد التوجه نحو مواصلة التوقف الشامل عن تقديم الخدمات المهنية وتجميد العمل بالمساعدة القضائية.