ها علاش هاجم أخنوش ولقجع. لشكر: أنا والقايد كنشدو مليون. أش دخل حمارتك في أسبوع الفرس؟ .

مصدر الصورة

فاطنة لويزا – كود ///

باش منتفهموش غلط، وما يجيش شي حد يقول بلي كنوصفو شي شخصية سياسية، أو شي حزب سياسي بشي حيوان ما، ففاش كنقولو في الكلام ديالنا حنا المغاربة: أش دخل حمارتك في أسبوع الفرس، فكنعنيو بها فقط، أنه فاش كيكونو الكبار لاعبين بيناتهوم، فشي حد صغيور وضعييف إذا دخل وسطهوم غادي يبغجوه، أو في أحسن الأحوال ما غاديش يردولو البال كاع.

وهاداك لي كيبغي يدخل حمارتو مثلا لأسبوع الفرس، او لشي موسم ديال التبوريدة، فالناس كطبق عليه المثل الشعبي لاخور: إذا شفتي شي حد راكب على قصبة، قوليه: مبروك العود.

لشكر، خرج فواحد اللقاء كيكشكش على أخنوش ولقجع، وقال بلي بزوجهوم وجهان لعملة واحدة.
بمعنى انه بغا بطريقة غير مباشرة يدير لينا داكشي زعماكينا ديال الحل الثالث.
يعني: راه ما كاينش غير الحمامة والتراكتور، كاين حتى الوردة.
ونسى أغنية محمد عبد الوهاب: يا ورد مين يشتريك؟
المشكل ماشي فطموح الاتحاد الاشتراكي ينافس على المرتبة الأولى فالانتخابات الجاية.
الاتحاد الاشتراكي حزب كبير، لكن كبير بتاريخو وتجربتو والأطر لي عطاها للدولة.
وعندو كل الإمكانيات ما زال باش يرجع للقوة ديالو، ويخرج من غرفة الإنعاش.
ولكن مع ادريس لشكر، لا يومكين،، لا يمكن خاص تقراها بطريقة ادريس لشكر.
المشكل في كلام ادريس فين كاين؟
كاين في أنه كان إلى وقت قريب كيتملق ليهوم بزوج: لأخنوش ولقجع.
التودد لأخنوش كان هو لي كيديرو بالعلالي.
والتقرب من لقجع كان كيديروه الأنصار ديالو فالبرلمان، لي كل مرة جايبين دواصا للقجع فاش كيجي للبرلمان، وهادشي كان على عينيك يا بن عدي.
والصحافيين لي كيواكبو أعمال البرلمان يأكدو هادشي.

ويأكدو كيفاش كانت كدوز النقاشات في اللجان البرلمانية فاش كيكون استدعاء لقجع ليها من طرف برلمانيي الاتحاد الاشتراكي، وعلى رأسهم شهيد.
أما أخنوش، فكلشي كيتدكر التكشكيش ديال لشكر، فاش خرج كيقول في نصف الولاية الحكومية انه خاص تعديل حكومي، ويكون سياسي ماشي تقني.
بمعنى غخراج حزب وإدخال واحد خور.
وهادشي بلا خبار الدستور المغربي، وبلا خبار علم السياسة.

هادشي كلو، حيت هو كان كيوعد المقربين منه المكلفين بمهمات لصالح السيطرة ديالو على الحزب، انهم غيدخلو للحكومة في أقرب تعديل، وانه مفاهم مع السي عزيز.
ونيت فاش بدا ينزل عبر الجريدة ديال الحزب، على لقجع، وبدات تظهر تدوينات من طرف مقربين منو كتطعن في لقجع، كان كيبرر بلي من مصلحة الحزب يطيح البام في الانتخابات، حيت راه دوزنا الكلمة مع أخنوش، وغنكونو معاه في الحكومة الجاية.
طبعا هادشي بلا خبار أخنوش ولا شوكي.
اليوم لشكر بعد الفشل أنه يوصل للعنقود، وهو يقول عليه حامض.
وخرج لينا عبارة: لقجع وأخنوش وجهان لعملة واحدة.

التفسير الوحيد لي عندي لهاد الخرجة، هو ان لشكر بدا كيحس بهزيمة انتخابية قاسية جاية، وبغا من دابا يلقى التبرير: حاربونا على هاد التصريح.
الاتحاد الاشتراكي ومع اقتراب الانتخابات، لقى صعوبات كبيرة يلقى مرشحين عندوم حظوظ للفوز، وفاش كيزكي مرشح غالبا كيأدي الأمر إلى انسحابات واستقالات ديال اتحاديين فديك المنطقة، وكاين لي ماشي كيستقيل فقط، ولكن كينتقل لأحزاب منافسة.

وحتى الأنصار ديالو عندو مشكل كبير معهم، هو انه في طريقه للولاية الرابعة على رأس الحزب، وزع بزاف ديال الوعود، ها لي وعدو بمنصب في مؤسسة دستورية، ها لي وعدو بالتزكية، ها لي وعدو غيخلي بنتو على رأس لائحة جهوية،، وزيد وزيد.

حتى لقا راسو في دائرة واحدة عاطي اكثر من وعد، وأخبار اللوائح الجهوية عطات الريحة.
أنا بغيت لشكر يشرح لينا : لقجع وأخنوش وجهان لعملة واحدة.
وواش هاد العملة صعبة ولا عملة غير قابلة للصرف؟
وعلاش كان كيتلصق في أخنوش؟

بلا ما نفكروه سابقا بالتكشكيش ديالو على الوافد الجديد، أيام تأسيس البام، قبل ما يطلب ويزاوك فهاد الوافد باش يدخل لحكومة عباس الفاسي من تحتها، وباش يحسم مؤتمر الحزب، ولي كان هو في مواجهة اتحاديين اكبر منو تجربة ونضجا.

إذا كيقصد بالعملة الواحدة انهم بزوج كانو في الحكومة، فبنفس المنطق: لشكر وبنكيران وجهان لعملة واحدة.

إذا كان كيقصد عندوم نفس المشروع السياسي، بغينا لشكر يقول لينا فين كيختلف الاتحاد الاشتراكي حاليا على باقي الأحزاب من حيث العرض السياسي لي كيقدمو للمغاربة، راه بحالو بحال لوخرين، بما فيهوم حزب الحرية والعدالة الاجتماعية، وحزب الامل، والاتحاد المغربي للديموقراطية لي حتى حد ما بقا عاقل على الرموز ديالهوم.
الغريب هو أن لشكر قال فديك الخرجة، هو ان أدوار لقجع كانت اكبر من أدوار أخنوش فالحكومة، حيت هو مول الميزانية.

غيقول شي حد: واش لشكر ما عارفش القيمة الدستورية ديال منصب رئيس الحكومة؟ واش بعقلو فاش كيقارن صلاحيات رئيس حكومة باختصاصات وزير منتدب عند وزيرة أخرى لي هي براسها كتخدم تحت إشراف رئيس الحكومة.
لا، ادريس ماشي هبيل حتى لهاد الدرجة، وعارف علاش قال ديك الكلمة.

هو قالها حيت حاس براسو زلق مع رئيس الحكومة، وهو مازال طامع يلقى بلاصة مع التجمع إذا فازو بالمرتبة الأولى، وما باغيش يقطع الخيوط معاهم، وعند بالو إذا فاز التجمع غتكون عند الاتحاد الاشتراكي حظوظ كبيرة يدخل للحكومة، حيت كيبانليه ان هاد الصراع الانتخابي بين الأحرار والبام غتكون نتيجتو ان واحد فيهوم لي غيكون في الحكومة.
ولذلك استدرك وقال بلي لقجع هو مول الفلوس في الحكومة، بمعنى انه إذا كان شي نقص فشي قطاع، فالمسؤولية ديال لقجع لي كانت التمويل ديالو ناقص.
وهادشي باش يغمق على الناس.
حيت الوزير المكلف بالميزانية ماشي هو لي كيحدد لكل قطاع أش غياخود.
قانون المالية لي كتصاوبو وزارة المالية، ماشي وزارة الميزانية، وكيتصادق عليه في مجلس الحكومة، ومن بعد فالبرلمان، هو لي كيحدد حصة كل قطاع.

الوزارة المندبة المكلفة بالميزانية، كيكون دورها استشاري أثناء وضع الميزانية، حيت هي لي كتقوليك واش ديك الفلوس ممكن التدبير ديالها ولا مستحيل، ثم كيكون عندها الدور الصعيب بعد المصادقة على الميزانية، وهو التنزيل، وهاد التنزيل صعيب بزاف، حيت جزء من الميزانية ديجا كيكون عندك، ولكن أجزاء أخرى كتكون افتراضية، بحال المبلغ لي مفترض تدخلو الميزانية مثلا من الضرائب، او من العملة الصعبة لي كتجي من العمال المهاجرين على برا أو من التجارة الخارجية، كيما أسعار الطاقة والحبوب والزيوت وشلا حاجات كنستوردوها كتكون مبنية على أرقام، ممكن تأدي تقلبات انها ترتفع، وبالتالي خاص الوزارة المكلفة بالميزانية تلقى حلول، وتحافظ على الالتزامات المالية ديال الدولة.
واش نجح لقجع فهاد الشي؟
جيب شي معارض راديكالي، وعطيه الوضعية، وغيقوليك ان الرجل نجح وبامتياز.
لقجع غير مسؤول ان هاد الوزارة خدات ميزانية أكبر او أقل مما تستحق، هداك مسؤولية الحكومة كلها.

هو مسؤول على انه في نهاية كل سنة مالية، الميزانية العامة ديال الدولة بقات واقفة على رجلها، وكل القطاعات توصلات بداك الشي لي عندها في قانون المالية، ونسبة النمو والتضخم وداكشي لاخور بقينا قراب من الأرقام لي تطرحات، وحتى التعديلات الاضطرارية على قانون المالية دازت بخير.
واش المالية العمومية في المغرب، بخير؟
الجواب كان في التقرير القاسي ديال والي بنك المغرب امام الملك.

انتقد سي الجواهري شلا سياسات عمومية، ولكن قال بلي رغم كلشي المالية العمومية بقات صامدة وسط هاد الإكراهات كلها.
وهادا هو لي كيفسر فواحد الجانب انه رغم الصراع بين الأحرار والبام على الانتخابات، فرئيس الحكومة غيعطي هاد الأسبوع مهمة الآمر بالصرف لميزانية صندوق التنمية المجالية لي هو ورش كبير وملكي، وكان محل ثلاثة ديال الخطابات ملكية أخيرة، غيعطيها رئيس الحكومة لسي لقجع باعتبار الوزير المنتدب المكلف بالميزانية، وما احتفظش بيها لراسو، ولا عطاها لوزيرة المالية لي من الحزب ديالو.
فهمتيها أسي ادريس هي هاديك، ما فهمتيهاش دابا الأيام تفهمها ليك.