بلغة الأرقام: الحبس ديال سكينة گلامور مدة عشر شهور غايتقام على ميزانية البلاد بواحد ثلاتة ديال المليون د سنتيم هي القليلة! دابا حنا خاسرين ثلاتة د المليون ومخدمين البوليس والقاضي والحراس وبلاصة فالحبس خاص تكون فيها شي شفّارة ولا نصابة! هادشي كامل على ود فرتون بان فجوج ثواني! .

مصدر الصورة

سهام البارودي – كود//

قاليك آ سيدي السجين الواحد كايتقام على الدولة بين 85-100 درهم فالنهار هي القليلة، يعني سكينة گلامور لاتشدات عشر شهور راه غاتقام على الدولة بواحد ثلاتة د المليون د السنتيم !

دابا هاد فرتون سكينة گلامور غايتقام علينا بغسيل الفندق ! مخدمين البوليس و المخزن و مضيعين المازوط ديال السطافيط و القاضي و حراس السجن و خاسرين زبالة ديال الفلوس من ميزانية البلاد و لي هي اصلا جاية من الضرائب لي كايخلصو المغاربة باش نشدو سكينة كلامور فالحبس ! علاش ؟ حيت بان فرتونها واحد جوج ثواني فلايڤ فشي منصة د التواصل الاجتماعي !

واش ماشي بزّاف ؟ واش ماشي الحماق هذا ؟ واش بغينا نوليو فحال مصر لي كايشدو التيك طوكورات فالحبس على اسباب تافهة ؟ واش البلاد غايزعزعها فرتون ؟ ياك البلاد اعتمدت العقوبات البديلة ( هادشي لاكان ضروري من العقوبة) واش ماكانش ممكن يعطيو لسكينة گلامور تجفف شي مقاطعة و لا تعاون شي جمعية ؟

حيت فالأخير، القضية ماشي غي قضية مؤثرة عرات فرتونها لايڤ. القضية هي واش العقوبة خاصها تكون غير باش نعاقبو، ولا خاصها تكون عندها معنى وهدف؟ واش من المنطق نصرفو عشرات الآلاف ديال الدراهم من المال العام على واحد الإنسان باش يدوز شهور فالحبس، على واحد الفعل لي ماكاينش فيه لا عنف لا ضحية مباشرة؟ إلا كان خاص العقاب، كاينين عقوبات كتردع وكتصلح وكتفيد المجتمع بلا ما نخلصو عليها كاملين. حيت السجن ماشي غير باب كايتسد على السجين، راه فاتورة كانخلصوها كاملين من جيوبنا ! و ماكانظنش البلاد لي كايهربو منها القاصرين باش يشدّو النوبة على الصوبة فسبتة شايطين عليها الفلوس باش تخسرهم على فرتون سكينة گلامور !