كازا: لي معول يفلت لسبتة.. البوليس والقوات المساعدة مطوقين محطة ولاد زيان تحسبا لموجة ثانية دالحريك غدا 15 غشت .

منذ

أميمة عطية – كود كازا ///

كتعرف محطة ولاد زيان فكازا حضورا أمنيا مشددا، البوليس والقوات المساعدة كيراقبو القاصرين اللي مسافرين، فإطار إجراءات استباقية كتعلق بالأخبار اللي رايجة حول الاستعداد لموجة تانية دالحراكة مرتقبة غدا 15 غشت لسبتة المحتلة.

هاد الانتشار الأمني فكازا جا من بعد ما انتاشرات أخبار فعدد من المجموعات والحسابات على مواقع التواصل الاجتماعي، محددين فيها موعد تاني غادي يتجمعو فيه الحراكة باش يمشيو للفنيدق غدا 15 غشت، فمحاولة للوصول من بعد إلى سبتة.

مصدر الصورة

وفايت كان استنفار أمني كبير فالمحطات ديال التران والكيران فكازا، من بعد الأحداث اللي عرفاتها سبتة نهار 30 و31 يوليوز، وقدرو البوليس يرجعو قاصرين حاولو يسافرو للشمال بوحدهم، ومنعوهم يمشيو فهاد الاتجاه.

وللإشارة فقط، كانت «كود» نشرت خبر أن الحرس المدني الإسباني حتى هو شدد الحراسة على الحدود، من بعدما أكد أن الدعوات المتداولة على فايسبوك وواتساب وإنستغرام موجودة وموثقة، غير أن الأجهزة الأمنية مازال ما عندهاش تقدير دقيق لعدد الأشخاص اللي ممكن يستاجبو ليها، ولا واش هاد الدعوات غادي تتحول فعلا لتحرك جماعي.

مصدر الصورة

وحتى لدابا، ما كاين حتى تأكيد على وقوع موجة جديدة، ولكن السلطات كتعامل هاد الاحتمال بجدية، وكتحاول تراقب التحركات والمسارات اللي ممكن يستعملوها الراغبين فالهجرة غير النظامية نحو الشمال.

مصدر الصورة