اللي حرثو المونديال دكاتو سبتة. صورتنا خسرات. مغاربة فاسبانيا مقيمين او سياح ل"كود": كلشي تبدل واعلامهم مشى بعيد فشيطنة بلادنا راه خسرنا معركة الرأي العام .

مصدر الصورة

كود سعيد الشاوي ///

كنا مجمعين ف”نيرخا” كناكلو ونضحكو بعد تبحيرة زوينة. دازت حدانا شيبانية. خنزرات فينا وقالت “باينة انتوما يالله جايين من سبتة”. معاد اللي عاود ل”كود” هاد القصة رد عليها “انا مالاگينيو” =يعني ولد مالگا”. معاد عندو الجنسية الصبليونية وعايش هنا. شكلو خلى هاد الصبليونية تربطو بسبتة.

دخول 72 الف حراك غالبيتهم مغاربة نهار 30 يوليوز 2026 حسب احصائيات وزراة الداخلية الصبليونية و40 الف فقط حسب داخليتنا، كان بداية مرحلة جديدة. واخا رجعات حسب الصبليون 70 الف، النظرة ديال الصبليون للمغاربة تبدلات.

فالكوسطا ديل صول كييان هاد الشي. تلاقات “كود” مع مغاربة سياح وخراين عايشين هنا. عدد منهم حس بهاد التحول. مع المونديال الميريكاني اللي داتو اسبانيا، ربح المغرب قلوب الملايين. صورتو ولات مشرقة عالميا. خدمة كبيرة دارت باش هاد الصورة تزيد تزيان بعد بهجة المونديال القطري باش وصلنا لنص النهاية.

لكن وفاة اكثر من 100 حراگ زايد دخول هاداك العدد لكبير خسر صورتنا “كندخل ديما لاسبانيا. هاد المرة جيت لاسباب صحية. حسبت باللي ما حامليناش. ما عمر هاد الاحساس جاتي بحال هاد المرة” يوضح يوسف موظف رباطي زار جنوب اسبانيا ففاتح غشت.

اعلامهم لعب دور كبير فشيطنتنا. خرجو متخصصين يسبو المغرب. ما بقاتش غير فالديكتاتورية ووووما خلاو حتى شي حاجة خايبة ما قالوهاش علينا. اعلامهم بحال احزابهم ما كاينش الفرق بين اليميني واليساري. بين الاحزاب المحافظة واليمينية المتطرفة والاحزاب القومية الجهوية والجمهورية واليسارية الراديكالية. كلهم اتفقوا ضد المغرب. كلهم كيرددو باللي المغرب خطر. هاد الشي اكدو استطلاع رأي تنشر ف”لاراثون” وقال كثر من 77 بالمائة بالي المغرب كيشكل خطر على اسبانيا. بلد عدو. بلد كيشكل خطر ومحتلين جوج مدنو: سبتة ومليلية. عبث هاد الشي.

المغرب فشل يخلق مثقفين يدعمو موقفو. مغاربة قاريين وقادرين يواجهو الصبليون. ايلى كنا فقضية الصحرا قدرنا بفضل الثقافة الكبيرة لاولاد الصحرا وقدرتهم على دحض مبرراتهم، فقد فشلنا يكون عندنا اعلاميين ومثقفين يحضرو لبلاطوهات قنواتهم باش يقدمو وجهة نظر مختلفة. دابا كاين كثر من مليون مغربي فهاد الدولة وكاين مدراس للاسبانية فالبلاد وكاين الاطر. يعني عندنا كلشي الا القدرة على اقتحام هاد الحصن المنيع ديالهم: الاعلام.

ففرنسا المغرب نجح فهاد الدومين. شفنا فهاد ازمة سبتة كانو نواب سابقين ومحللين وصحافيين من تيارات مختلفة كيدافعو على الرواية المغربية فالقنوات الفرنسية. هاد الشي ما شفناهش.

هادا للي خلق العدوانية عند الصبليون ضد ما هو مغربي. ما بقيناش نشوفو اجانب وغيرهم لابسبن تونيات المنتخب خاصة حكيمي كيف بعد المونديال. هاد الشي قل بزاف. “مشيت ندير ليصانص فواحد الگازولينا. تخلعت باش اسباني كيكلاكسوني علي بالجهد وكيهز فيدو. انا هنا سنوات كثيرة ما عمرني شفت هاد التصرف. كنت راكب فطونوبيلة ماتريكول مغربي” يشرح عدنان ل”كود”. هاد العدوانية، يضيف ل”كود”، ماشي عند كلشي. فبوريطو بانوس =بلاصة لملايرية= قليل باش كتحس بهاد الشوفة العنصرية. كتلقاها فشي بلايص قلال

لمغاربة مع هاد الازمة ما خسروش غير صورتهم فاسبانيا. خسروها فالعالم. الاعلام كولو كيهدر على هروب 72 الف وبالتزامن مع عيد العرش. صورتنا خسرات “تصور كنعرف شي حد من السودان، عيط علي كيسول اش وقع فالبلاد” يحكي رجل الاعمال احمد ل”كود”. واكد باللي ماشي غير الاوربيين اللي كيسولو، حتى الافارقة. هاد رجل الاعمال وغيرو كيحسو بالحشمة باش كيسولهم شي حد “حنا ما عرفناش اش وقع. كيفاش نشرحو ليهم باللي المغرب فيه تقدم ووو مع هاد الشي اللي وقع فسبتة”.

الاحراج كيحسو بيه اكثر ديبلوماسيون وديبلوماسيات مغربيات فاوربا وغيرها. سؤال سبتة كيتكرر فكل مناسبة. احدهم قال ل”كود” “عيينا بصاح من هاد السؤال”.

المغرب الرسمي ما دارش اجراءات باش يوقف هاد الاستهداف لصورتنا “خاصنا مدة باش نرجعو ديك الصورة” كيف سبق لديبلوماسي اكد ل”كود” فالسابق. لكن خرجة وزير العدل وهبي عبد اللطيف قدر يقاد الامور. اعلامهم اليوم ما كيهدر غير على تصريحو اللي قال فيه باللي الرباط تقدر توقف التعاون القضائي =يعني تبادل المتهمين ووو= ايلى اسبانيا ما تعاوناتش مع المغرب فارجاع القاصرين والحراكة. كانت ضربة زوينة منو. تعطلات بزاف ولكن حركات امور. ما بقاش المغرب مقترن غير بالفضايح. دار موقف خلعتهم بعد تصريح وزيرة العدل روبليس فسبتة باللي هاد لمدينة ومليلية “صبليونتين وبزاف”