المغرب ماشي جدارمي ديال اوروبا.. وهبي خرج عينيه فالصبليون وبين باللي أسلوب بوريطة الضعيف المهزوز ماواكلش فالسياسة الخارجية .

مصدر الصورة

كود -هناء أبو علي//

دخل عبد اللطيف وهبي لواحد الملف اللي كيكون محسوب بالمليمتر على الخارجية المغربية، وقصد الصبليون بكلام سياسي مباشر، بلا «لغة خشبة»، وبلا داك النوع ديال البلاغات اللي كل كلمة فيها كتدوز من عشرة البيرويات قبل ما تخرج.

وهبي قال نيشان أن المغرب ماشي «جدارمي » أوروبا، وماشي مطلوب منو يبقى ساكت ويتلقى الضغط والابتزاز السياسي باسم «العلاقات النموذجية» وسبتة ومليلية غادي يرجعو للمغرب، هاد التصريح فعفع مدريد حتى صبحات وزيرة الدفاع الإسبانية مارغريتا روبليس فسبتة، كتخطب من وسط القشلة بالميني جيب.

هادشي كيخلينا نسولو،علاش وزير العدل قدر يخرج بكل جرأة بعقلية السياسي التقدمي الميداني اللي عارف أن الكومبا ما كتربحش غير فالاجتماعات المغلقة، وإنما حتى فالرأي العام والإعلام؟

بوريطة ضعيف لعاب صغير وغادي يبقى صغير. ناقصو التكوين السياسي. كيعرف يركب على خدمة لخراين. شفناه فكولومبيا مشى يتبندد مع انتخاب رئيس يميني وطبعا كانت خدمة قبل وعرفنا باللي غادي يسحب اعترافو بالبوليساريو. نفس بوريطة كان غبر باش الرئيس السابق اليساري اعتارف بالبوليساريو. كيبان غير فاحداث زوينة.

كيهدر بحال شي ببغاء. محفضينو. ما عندوش خطاب لقفوزية. باش كيهدر كيهدر بكلام جاف كتبين ضعفو.

فهاد الازمة مع الصبليون ما دار والو من غير خرج باش جمع صحافيين اجانب وما كانتش عندو الشجاعة حتى يصرح باسمو. تخبى ورا “مسؤول حكومي”. شفنا خرجة وهبي ولد السياسة. خرجة قافزة واخا جات معطلة بزاف بزاف. عطاهم جوج كلمات تقلبات اسبانيا باش كرر باللي سبتة ومليلية مغربيتين

أكبر ديفو فالمقاربة الصامتة ديال بوريطة، هو أنه مخلي الدول الأخرى كتستغل الإعلام والسياسيين ديالها باش يوجهو الرأي العام الدولي والوطني،فحين بوريطة عاطيها لـ “لغة الخشب” والبلاغات صيك.

هاد الأسلوب كيحرم المغرب من “صوت الشارع” لي هو واحد القوة ضاغطة لي تقدر تعاون المفاوض المغربي وتعطيه الهيبة فالمحافل الدولية.

هنا كيبان بلي التكنوقراط ما عندوش النفس ديال السياسي،الخرجة ديال وهبي بينات بلي بوريطة ضعيف، كينقصو “النيف” السياسي والجرأة لي كتحتاجها بحال هاد الأزمات. وريطة ولف الاجتماعات المغلقة والابتسامات الدبلوماسية، وهادشي كيخليه يبان عاجز قدام متغيرات جديدة لي كتفرض عليك تخرج عينيك وتهضر نيشان بلا زواق.

الدبلوماسية الباردة سلات صلاحيتها ومبقاتش كتوكل مع شركاء ولاو كيتعاملو بالابتزاز والبراغماتية بالعلالي. خاصو يتعلم من وهبي.