وزير الخارجية والتعاون ناصر بوريطة كيبان صغير فالماتشات لكبيرة. فالاحداث لكبيرة ديما مخبي حتى دوز الحملة. فقضية حريگ 72 الف مغربي لسبتة حسب ارقام الداخلية الصبليونية او 40 الف حسب داخليتنا، كان صغير. باش عيط للصحافيين والوكالات الدولية وهدر معاهم ولد البارح (3 غشت 2026) تخبى وراء “مسؤول حكومي”. ما قدرش حتى يخرج مباشرة واخا كلشي عارفو.

فهاد الخرجة بان غير مقنع لا للخاريج واخا حنا ما سوقناش فهاد الخاريج ولا للداخيل مادام هو وزير مغربي خاصو يحتارم اولا لمغاربة. عطاها غير للانشاء وصافي. بل دار خطأ كبير باش هاجم الاحزاب السياسية باش قال باللي كاين “كان بعض الفاعلين السياسيين دون مستوى اللحظة التاريخية، وكم كانت ردود أفعالهم مخيبة للآمال”. انت اصلا ماشي متحزب. ثانيا ما عمر شي وزير خارجية ديالنا هاجم الاحزاب بهاد الطريقة. عبد الاله بنكيران اعتابر هاد الهجوم على حزبو باش خرج ببيان عن الامانة العامة لحزب العدالة والتنمية وطالب بلجنة على اللي وقع يرأسها الملك شخصيا.

طبعا الاحزاب من حقها دير بيانات ماشي يجي واحد بحال بوريطة ويهاجمها ويعتابرها تفتاقر لغياب الرؤية والقصور الاستراتيجي والاستغلال السياسي. راه الاحزاب دارت باش تستغل الاحداث سياسيا. اسبانيا نموذجا.

هاد لوزير خاصو يمشي فحالو على هجومو على الاحزاب. على سوء تدبيرو لملف الصحافي علي لمرابط. مواطن مغربي خرج فالخارجية كثر من 10 سنوات كيف شرح كثر من مرة وطلب من الادارة ديال الخارجية اللي بوريطة وزيرها وكاتبها العام (رافض يجي شي حد لهاد البوسط) وثيقة. من حقو. رفضات كاع الادارات تجاوبو واضطر يجي برجليه وهي باش وقع هاداك الفيلم وتشد فطنجة وداوه لكازا…. لحسن الحظ فبلادنا ما كاينش غير اللعابة الصغار بحال بوريطة كيشرفو على مؤسسات مهمة، كاينين لعابة كبار كيتزادو كبر فالاحداث لكبيرة. قدرو هادو يحلو القضية ويخرج المغرب كدولة باقل الخسائر.

كون السي بوريطة دار خدمتو. يرد على مراسلات رسمية للمرابط ما يوقع والو.

عليها هاد لوزير راه خاصو يمشي فحالو. مع انتخابات شتنبر وتشكيل حكومة جديدة خاصو يجيبو وجه جديد يعطي الثقة للديبلوماسيين لمغاربة ونتجاوزو اخطاء هاد اللعاب الصغير فالديبلوماسية المغربية