من قصر فالسويسي لـ شيفور رئيس لجنة الداخلية..الخياط الملايري المحرشي ففضيحة استغلال سيارة البرلمان فـ عيد العرش: كيفاش هاد السياسي بحال القرع فينما ضربتيه يسيل وسبق كلاها ف ملف تقنين الكيف .

مصدر الصورة

كود تطوان//

فحفل الولاء الوزراء جاو ف الحافلات (الكار) بحال جميع المسؤولين اللي احترموا التوجيهات، ولكن الخياط العربي المحرشي جاي فـ سيارة الخدمة التابعة للبرلمان وهو راكب فيها كـ”شيفور” لرئيس لجنة الداخلية بمجلس النواب فـ حفل الولاء.هادي راه ما كاتوقع غير فـ المشهد السياسي المغربي اللي فيه شي نفعيين وانتهازيين ما كيعرفوش إمتى يرجعو للور.

الفيديو اللي كيروج لـ”خياط الجلالب” السابق، اللي دار ثروة وقصر فـ السويسي، وهو مغادر ساحة المشور السعيد بـ سيارة البرلمان من نوع (BMW)، أثار موجة ديال السخرية والغضب فـ مواقع التواصل الاجتماعي. كاين للي تساءل: شنو كادير سيارة المؤسسة التشريعية فـ مناسـبة بحال هادي؟ وعلاش المحرشي، اللي طيروه من المكتب السياسي لـ”البام” فـ عهد المنصوري بعدما تم إبعاد كاع الأسماء اللي حولها شبهات، ومن بعد رجع من النافذة، باقي كيبان فـ الواجهة كأنه شخصية نافذة؟ وحتى هو كيعطي تصريحات على المشهد الانتخابي وان زعيم حزبي منافس كان باغي يدخل البام ف 2016.

المحرشي، اللي عاش أيام عز فـ ملف تقنين “الكيف” وايام الكحط ف حراك الريف وكان كيقدم راسو هو “المحامي” الأول على تقنين القنب الهندي، وتلقا ضربة كبيرة بعدما تم إبعاد ملف الكيف فـ جهة تطوان الحسيمة وإيقاف الأنشطة الرسمية اللي كان كيقودها، جاء تأسيس الوكالة الوطنية لتقنين الأنشطة المتعلقة بالقنب الهندي باش يقطع الطريق على الاستغلال الانتخابوي.
وتجل هاد العزل الميداني فـ الندوة الدولية اللي احتضنتها جامعة محمد الخامس بالرباط، قبل سنوات، حول “تقنين الاستعمالات المشروعة للقنب الهندي”، والتي عرفت مشاركة وزانة لوزراء مثل خالد أيت الطالب وعبد اللطيف ميراوي ومسؤولين كبار، بينما غاب المحرشي تماماً ولم يتم استدعاؤه، فـ إشارة واضحة بلي الدولة غادية فـ اتجاه إعطاء الملف بعد تقني، علمي، واقتصادي (بحكم أن السوق العالمية غتوصل لـ 230 مليار دولار فـ 2028)، بعيداً على “الشناقة” والاستغلال السياسي.
المحرشي اللي حاول فـ 2019 يدير فيها “كبير” وأعلن تجميد العضوية قبل ما يرجع لـ حجمو الطبيعي وينضبط لقرارات الحزب، كيبان اليوم بحال اللي باقي ما بغاش يفهم بلي زمن اللعب واستغلال سيارات الدولة للتباهي فـ المناسبات الوطنية سالا، وأن الصورة ديال سيارة البرلمان فـ حفل الولاء زادت كشفت حجم العشوائية ف حضور هاد الفئة السياسي.