نزار عماتو المقاعد ...قالك صفر تسامح مع الفساد وعطى التزكية للسنتيسي.. علاه تشجيع الترحال ماشي فساد سياسي وأخلاقي واحتقار للمناضلين؟ جايب نسيب عبد المجيد صحة حيث السنتيسي كيقلب فين يتخبى باش يحمي مصالحو ويقطع الطريق على هدم المركب التجاري ديالو فالولجة .

كود كازا//

نشرت الصفحة الرسمية ديال مفتشية الاستقلال بسلا خبر تزكية اللجنة التنفيذية لادريس السنتيسي كمرشح للحزب بدائرة سلا المدينة.

هاذ الخبار شي عام وهو كيدور ونزار كان كيهرب من الجواب وكيعطل الالتحاق الرسمي. هاذ الترشيح بوحدو فضيحة. نزار هاذي شي جوج سيمانات طلق حملة صفر تسامح مع الفساد. كي درتي ليها آحفيد علال الفاسي.

مصدر الصورة

واش استقطاب رئيس فريق حزب سياسي فالبرلمان ماشي فساد سياسي وأخلاقي واحتقار للقواعد والمناضلين. ولا غي حيث السنتيسي نسيب عبد المجيد الفاسي منخصروش ليه خاطرو.
أول تبعات ترشيح السنتيسي باسم حزب الاستقلال هو استقالة عبد الكريم الحسايني مرشح الحزب في الانتخابات الأخيرة واللي تكلاصا هو الخامس بفارق قليل على السنتيسي، والتحاقه بالاتحاد الاشتراكي للقوات الشعبية.

واش حزب الاستقلال معندوش المناضلين فسلا، اللي فيها أعضاء اللجنة التنفيذية وفيها عمدة وفيها رئيس مقاطعة وفيها قبيلة ديال الاستقلاليين فالنقابة والتنظيمات الموازية باش نزار يجيب واحد من الحركة الشعبية.

ادريس السنتيسي رئيس الفريق الحركي فالولاية المنتهية الحالية، جاي لحزب الاستقلال اللي دوز معاه حروب داحس والغبرا، ماشي حبا فالوحدة والتعادلية وفنشيد مغربنا وطننا.

العمدة السابق ديال سلا جاي باش يتحامى فحزب الاستقلال ويدافع على مصالحو باسم حزب قوي غيكون فرئاسة الحكومة ولا عضو مؤثر فيها، باش يحمي مركب الولجة اللي كولو عشوائي من الهدم ومن نزع الملكية رغم الصرامة اللي غادي بها والي الرباط فهاذ الملف.
السنتيسي جاي لحزب الاستقلال باش المدرسة اللي سد فأكدال وبدل ليها لافيكطاصيون ديال من تجهيزات ديال لمنفعة العامة، باش يتخبى فالحزب ويرخصها مشروع عقاري فبلاصة ولات كتسوى الذهب فقلب الرباط، السنتيسي جاي لحزب الاستقلال باش داكشي اللي بداه فالحركة يامات العز ديالها يكملو فالاستقلال.
هاذ الشي علاش شي استقلاليين كاعيين على نزار واخا هو كاع ممسوق ليهم وكيدير غي اللي فراسو حيث الهدف ديالو هو يأخذ المقاعد ف 2026 و 2027 واللي معجبوش الحال أرض الله واسعة.